សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្តាល៖ ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលខេត្តកណ្តាល សូមឆ្លើយតបជូនគណនីហ្វេសប៊ុក សុំមិនបញ្ចេញឈ្មោះ ដែលបានផ្ញើសារសំណូមពរក្នុងផេកស្នងការដ្ឋាននគរបាលខេត្តកណ្តាល មានខ្លឹមសារថា ៖ «សូមទោសបងខ្ញុំបាទជាប្រជាពលរដ្ឋរស់នៅភូមិព្រែកស្លែង ស្រុកកណ្តាល ស្ទឹងខេត្តកណ្តាល ខ្ញុំមានចម្ងល់មួយតើសព្វថ្ងៃនេះរាជរដ្ឋាភិបាលលោកបានអនុញ្ញាតអោយប្រជាពលរដ្ឋជួបជុំផឹកសុីច្រៀងខារាអូខេហើយរឺនៅបង? ហើយភ្ញៀវសុទ្ធតែអ្នកចម្ងាយទៀតព្រោះនៅភូមិខ្ញុំមានគេផឹកសុីហើយច្រៀងលេង»។
ក្រោយពីទទួលបានព័ត៌មានភ្លាម ដោយមានការចង្អុលបង្ហាញពីក្រុមការងារប្រតិកម្មរហ័សខេត្ត លោកវរសេនីយ៍ទោ ឡេង សុខរុន អធិការនគរបាលស្រុកកណ្ដាលស្ទឹង បានបញ្ជាទៅលោកនាយប៉ុស្តិ៍នគរបាលរដ្ឋបាលព្រែកស្លែង ចុះស្រាវជ្រាវករណីខាងលើ។
ជាលទ្ធផល៖ នៅព្រឹកថ្ងៃទី២៨ ខែមិថុនា ឆ្នាំ២០២១ កម្លាំងប៉ុស្តិ៍នគរបាលរដ្ឋបាលព្រែកស្លែង ដោយមានការចូលរួមពីក្រុមប្រឹក្សាឃុំ និងលោកមេភូមិព្រែកស្លែង ចុះទៅពិនិត្យមើលដល់ផ្ទះរបស់ឈ្មោះ មាស មន្នី ភេទស្រី អាយុ៥២ឆ្នាំ មានទីលំនៅភូមិ-ឃុំខាងលើ ពិតជាមានការជួបជុំផឹកសុីចាក់ធុងបាសច្រៀងពិតប្រាកដមែន។ ក្រោយពីបានសួរនាំរួច លោកនាយប៉ុស្តិ៍នគរបាលរដ្ឋបាលព្រែកស្លែង បានធ្វើការអប់រំ ណែនាំ និង ធ្វើកិច្ចសន្យាមិនឱ្យមានការផឹកសុីជួបជុំច្រៀងបន្តទៅទៀតឡើយ ដែលជាហេតុបង្ករឱ្យមានសំឡេងរំខានដល់អ្នករស់នៅជិតខាងផង និងយោងទៅតាមការណែនាំរបស់ក្រសួងសុខាភិបាល មិនឱ្យមានការជួបជុំគ្នាច្រើន គឺត្រូវអនុវត្តវិធានការ ៣កុំ ៣ការពារ ជាដាច់ខាត។
អាស្រ័យហេតុនេះ សូមសាធារណជន ដែលប្រើប្រាស់បណ្តាញសង្គមមេត្តាជ្រាប៕
ដោយ ៖ សិលា
