សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរសម្នាក់សង្ស័យស្រវឹងស្រាខ្លាំងបានបើករថយន្តម៉ាក FORESTER រេចង្កូតទៅបុករថយន្តធុនធំដឹកសត្វគោនិងក្របីពីចំហៀងពេញទំហឹង បណ្តាលឲ្យខ្ទាតទៅប៉ះកង់មួយគ្រឿងនិងទ្វារផ្ទះប្រជាពលរដ្ឋបណ្ដាលឲ្យរងការខូចខាតយ៉ាងដំណំ ។
ហេតុការណ៍គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង១០និង ២០នាទីយប់ថ្ងៃទី ២៨ ខែមិថុនា ឆ្នាំ២០២១ នៅតាមបណ្តោយផ្លូវលេខ៥៩៨ ជិតរង្វង់មូលកាំកូសុីធី ក្នុងសង្កាត់ទឹកល្អក់១ ខណ្ឌទួលគោក រាជធានីភ្នំពេញ។
បេីតាមការរៀបរាប់ពីតៃកុងរថយន្តធុនធំម៉ាក HINO ពណ៌ក្រហម ពាក់ស្លាកលេខពោធិ៍សាត់3A-1446 បានប្រាប់ឱ្យដឹងថា មុនកើតហេតុហេតុរូបគាត់បើករថយន្តដឹកសត្វគោនិងក្របីចេញពីខេត្តបាត់ដំបង ឆ្ពោះទៅខេត្តព្រៃវែង ដោយធ្វើដំណើរក្នុងទិសដៅពីជើងទៅត្បូងក្នុងល្បឿនមធ្យម លុះមកដល់ចំណុចកើតហេតុខាងលើស្រាប់តែមានបុរសម្នាក់សង្ស័យស្រវឹងស្រាធ្លាក់ភ្នែកបានបើករថយន្តមួយគ្រឿងម៉ាកSUBARU FORESTER ពណ៌ទឹកប្រាក់ពាក់ស្លាកលេខភ្នំពេញ2AO-7756ធ្វើដំណើរបញ្ច្រាសទិសដៅគ្នាពីត្បូងទៅជើង បានរេចង្កូតមកខាងឆ្វេងដៃជ្រុលមកបុកពីចំហៀងរថយន្តធុនធំពេញទំហឹង បណ្ដាលឲ្យរថយន្តធុនតូចខ្ទាតមកខាងស្ដាំដៃទៅប៉ះកង់មួយគ្រឿងដែលម្ចាស់ដាក់នៅមុខផ្ទះ និងទ្វារផ្ទះពលរដ្ឋរងការខូចខាតយ៉ាងដំណំ ចំណែករថយន្តធុនធំរងការខូចខាតបន្តិចបន្តួចប៉ុណ្ណោះ ។
ក្រោយកើតហេតុ សមត្ថកិច្ចមូលដ្ឋានបានចុះមកដល់ និងមានតំណាងភាគីទាំងសងខាងចុះមកដល់កន្លែងកើតហេតុ ដែរ ដោយខាងភាគីរថយន្តធុនតូចបានចេញសំណងថ្លៃខូចខាតទៅឲ្យរថយន្តធុនធំ កង់មួយគ្រឿង និងទ្វារផ្ទះប្រជាពលរដ្ឋ ដើម្បីបញ្ចប់រឿងនៅនឹងកន្លែងកើតហេតុ៕
ដោយ ៖ ភារ៉ា ដង្កោ
