សារព័ត៌មាន នគរវត្ត តែងតែនាំមុខគេជានិច្ច
ខេត្តត្បូងឃ្មុំ ៖ កម្លាំងនគរបាលប៉ុស្តិ៍រដ្ឋបាលប៉ើស២ សហការជាមួយកម្លាំងប្រជាការពារបានឃាត់ខ្លួនជនសង្ស័យម្នាក់គ្រាដែលជននេះឈររេរារួចព្យាយាមបោះចោលកញ្ចប់ថ្នាំញៀនបម្រុងរត់គេចខ្លូនពេលឃើញកម្លាំងសមត្ថកិច្ចនៅចំណុចខ្ទមចាំស្រែខាងត្បូងភូមិប៉ើស ឃុំប៉ើស២ នាយប់ថ្ងៃទី០១ខែកក្កដាឆ្នាំ២០២១។
សមត្ថកិច្ចឱ្យដឹងថា នៅពេលកម្លាំងចុះល្បាតក្នុងភូមិសាស្ត្រខាងលេីបានប្រទះឃើញមុខសញ្ញាសង្ស័យម្នាក់ឈ្មោះ ខាន់ លីតា ភេទប្រុស អាយុ២៤ឆ្នាំ រស់នៅភូមិទួលសម្បត្តិ ឃុំប៉ើស២ ស្រុកក្រូចឆ្មារ កំពុងឈររេរានៅក្បែរខ្ទមចាំស្រែនោះ ។ ឃើញដូច្នេះ កម្លាំងយើងបានជិះម៉ូតូចូលទៅជិតបម្រុងហៅឈ្មោះខាងលើមកធ្វើការសាកសួរ តែជននេះពេលឃើញសមត្ថកិច្ចយើងក៏បោះថ្នាំញៀនចំនួន១កញ្ចប់ទៅទើរលើគុម្ពស្រូវខាងជើងខ្ទម ភ្លាមនោះកម្លាំងនគរបាលយើងក៏បានចុះទៅរើសយកថ្នាំញៀន និងឃាត់ខ្លួនជនសង្ស័យរូបនេះតែម្តង ។
ការឃាត់ជននេះដោយមានការឯកភាពពីលោកឧត្តមសេនីយ៍ត្រី ហុង ណាក់ ស្នងការរងទទួលផែនការងារប្រឆាំងបទល្មើសគ្រឿងញៀន និងមានការសម្របសម្រួលពីលោក សូ សុវិទ្យា ព្រះរាជអាជ្ញាររង នៃអយ្យការអមសាលាដំបូងខេត្តត្បូងឃ្មុំ ។
បច្ចុប្បន្ន ជនសង្ស័យរួមនឹងវត្ថុតាងខាងលើត្រូវបានបញ្ជូនមកអធិការដ្ឋាននគរបាលស្រុកក្រូចឆ្មារ ដើម្បីចងក្រងសំណុំរឿងតាមនីតិវិធី ៕
ដោយ ៖ វណ្ណៈ
