សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ បុរសម្នាក់សង្ស័យថាស្រវឹងស្រាខ្លាំងហើយបានជិះម៉ូតូប្រើប្រាស់ល្បឿនលឿនទៅបុកជាមួយរថយន្តម៉ាកព្រូសក្នុងទិសដៅបញ្ច្រាសគ្នាយ៉ាងពេញទំហឹងលាន់សូរដូចរន្ទះបណ្ដាលឱ្យរងរបួសធ្ងន់ធ្ងរ បង្កការភ្ញាក់ផ្អើលដល់អ្នកភូមិកាលពីវេលាម៉ោង១២និង២៥នាទី ថ្ងៃទី២ខែកក្កដាឆ្នាំ២០២១ នៅលើផ្លូវជាតិលេខ៣១៦ ត្រង់ចំណុចភូមិស្វាយតាយាន ឃុំ ស្វាយតាយាន ស្រុកកំពង់រោទ៍។
នគរបាលស្រុកកំពង់រោទ៍បានឱ្យដឹងថាបុរសដែលរងរបួសមានឈ្មោះ ឌឹម រតនា អាយុ ២៣ឆ្នាំ មុខរបរកម្មកររោងចក្រ ស្នាក់នៅភូមិធ្នង់ ឃុំរមាំងថ្កោល ស្រុក ស្វាយទាប ខេត្តស្វាយរៀង ជិះម៉ូតូម៉ាកស៊ុយហ្ស៊ុយគី(Nex) ពាក់ស្លាកលេខ ភ្នំពេញ ១HF-៨៦០៤រងការខូចខាតយ៉ាងដំណំ។
ចំណែកអ្នកបើករថយន្តមានឈ្មោះ វិន លីណា ភេទប្រុស អាយុ២៩ឆ្នាំ មុខរបរ លក់ទូរស័ព្ទ មានទីលំនៅភូមិត្រោក ឃុំខ្សែត្រ ស្រុកកំពង់រោទ៍ បើករថយន្តម៉ាក ព្រូស ពណទឹកប្រាក់ ពាក់ស្លាកលេខ ភ្នំពេញ ២BI-០៧៨៧។
តាមសាក្សីបានឱ្យដឹងថា មុនកើតហេតុបុរសរងគ្រោះនេះបានជិះម៉ូតូមួយគ្រឿងម៉ាកស៊ុយហ្ស៊ុយគី(Nex) ពាក់ស្លាកលេខ ភ្នំពេញ ១HF-៨៦០៤នៅលើផ្លូវជាតិលេខ៣១៦ក្នុងទិសដៅពីត្បូងទៅជើងទំនងជាស្រវឹងស្រាហើយប្រើប្រាស់ល្បឿនលឿន ស្រាប់តែទៅបុកជាមួយរថយន្តម៉ាក ព្រូស ពណទឹកប្រាក់ ពាក់ស្លាកលេខ ភ្នំពេញ២BI-០៧៨៧ដែលបើកក្នុងទិសដៅបញ្ច្រាសគ្នាយ៉ាងពេញទំហឹងបង្កការភ្ញាក់ផ្អើលតែម្ដង។
ក្រោយមកសមត្ថកិច្ចជំនាញបានមកដល់ធ្វើការវាស់វែងយកជនរងគ្រោះទៅកាន់មន្ទីរពេទ្យ និងអូសយកវត្តុតាងរថយន្ត និងម៉ូតូទៅមករក្សាទុកនៅប៉ុស្តិ៍រដ្ឋបាលស្វាយតាយានដើម្បីដោះស្រាយតាមច្បាប់៕
ដោយ៖ យឹម សុថាន
