សារព័ត៌មាន នគរវត្ត តែងតែនាំមុខគេជានិច្ច
ការប្រកួតវគ្គ៤ក្រុមចុងក្រោយនៃព្រឹត្តិការណ៍ដណ្តើមជើងឯកយូរ៉ូ២០២០នៅរាត្រីនេះ បានចាប់ផ្តើមហើយ ក្នុងនោះក្រុមជម្រើសជាតិអុីតាលីត្រូវធ្វើការធ្ងន់ដោយប៉ះក្រុមម្ចាស់ជើងឯក៣សម័យកាលអេស្ប៉ាញ នៅវេលាម៉ោង២រំលងអធ្រាត្រឈានចូលថ្ងៃទី៧ កក្កដានេះ។
យោងតាមតារាងផ្គូរផ្គងរបស់ soccerway បានបង្ហាញថា ក្រោយពីរកឃើញ៤ក្រុមឡើងវគ្គពាក់កណ្តាលផ្តាច់ព្រ័ត្រកាលពីសប្តាហ៍មុនការប្រកួតជម្រុះបានចាប់ផ្តើម។ អុីតាលីជាក្រុមខ្លាំងនៅរដូវកាលនេះដោយមិនទាន់ស្គាល់រសជាតិចាញ់ទាល់តែសោះ ក្នុងនោះក្រុមជម្រើសជាតិអុីតាលីក្នុងវគ្គជម្រុះតាមពូលគឺឈ្នះទួរគី៣ទល់០, ឈ្នះស្វ៊ីស៣ទល់០ និងឈ្នះវែល១ទល់០។ ចូលដល់វគ្គ១៦ក្រុមចុងក្រោយ អុីតាលីបន្តឱកាសយកឈ្នះក្រុមខ្លាំងអូទ្រីស២ទល់១ក្នុងម៉ោងបន្ថែម។ ពេលចូលដល់វគ្គ៨ក្រុមចុងក្រោយក្រុមខ្លាំងមួយនេះបានយកឈ្នះក្រុមខ្លាំងបែលហ្ស៊ិកក្នុងលទ្ធផល២ទល់១ មានឱកាសឡើងវគ្គពាក់កណ្តាលផ្តាច់ព្រ័ត្រយូរ៉ូនៅឆ្នាំនេះ។
ចំណែកក្រុមអេស្ប៉ាញវិញ ក្នុងវគ្គជម្រុះតាមពូលគឺស្មើជាមួយស៊ុយអែត០ទល់០, ស្មើជាមួយប៉ូឡូញ១ទល់១ និងបំបាក់ស្លូវ៉ាគី៥ទល់០។ ចូលដល់វគ្គជម្រុះ១៦ក្រុមចុងក្រោយ អេស្ប៉ាញបានយកឈ្នះក្រុមក្រូអាត៥ទល់៣ក្នុងម៉ោងបន្ថែម។ ចូលដល់វគ្គ៨ក្រុមចុងក្រោយក្រុមខ្លាំងអេស្ប៉ាញបានយកឈ្នះក្រុមខ្លាំងស្វ៊ីសក្នុងបាល់កាត់សេចក្តីប៉េណាល់ទី បន្ទាប់ពីប្រកួតស្មើគ្នា១ទល់១។
សម្រាប់ការប្រកួតរវាងក្រុមអុីតាលីនឹងអេស្ប៉ាញរាត្រីនេះ ប្រវត្តិជួបគ្នារវាងក្រុមទាំង២ក្នុង៦ប្រកួតចុងក្រោយគឺ អុីតាលីឈ្នះ១ដង, អេស្ប៉ាញឈ្នះ៣ដង និងស្មើគ្នា២ដង ប៉ះគ្នាចុងក្រោយក្នុងជំនួបជម្រុះ World Cup តំបន់អឺរ៉ុបគឺអេស្ប៉ាញយកឈ្នះអុីតាលី៣ទល់០។
សូមបញ្ជាក់ថា ក្រុមអុីតាលីធ្លាប់ឈ្នះពានរង្វាន់ទ្វីបអឺរ៉ុបតែម្តងគត់កាលពី១៩៦៨ ខណៈដែលអេស្ប៉ាញគឺជាក្រុមជោគជ័យមួយដែលធ្លាប់ឈ្នះពានរង្វាន់នេះ៣ដង គឺកាលពីឆ្នាំ១៩៦៤, ឆ្នាំ២០០៨ និងឆ្នាំ២០១២។ ក្រុមទាំង២នឹងត្រូវប៉ះគ្នាវេលាម៉ោង២រំលងអធ្រាត្រដើម្បីប្រជែងយកកៅអីទៅកាន់វគ្គផ្តាច់ព្រ័ត្រ ដែលមួយគូទៀតក៏ត្រូវប្រជែងដូចគ្នាគឺអង់គ្លេសប៉ះដាណឺម៉ាកនៅថ្ងៃស្អែកដែរ ៕
ដោយ៖ ភារៈ
