សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បេីតាមការបញ្ជាក់របស់ប្រធានមន្ទីរធនធានទឹក និងឧតុនិយម ខេត្តបន្ទាយមានជ័យ លោក យឹម ប៊ុនរ៉ុម បានថ្លែងនៅថ្ងៃទី៧ ខែកក្កដា ឆ្នាំ២០២១នេះថា៖ ដំណាំស្រូវប្រមាណជាពីរពាន់ហិកតា ស្ថិតនៅស្រុកមង្គលបូរី ដែលស្ទើរទឹក ត្រូវបានមន្ទីរធនធានទឹក និងឧតុនិយមខេត្ត ជួយអន្តរាគមន៍ឱ្យរួចផុតពីការខូច បានជាង ៧០ភាគរយ ហើយនិងជួយសង្រ្គោះរួចទាំងស្រុង នៅរយៈពេលពីរ បីថ្ងៃខាងមុខនេះ។
ប្រធានមន្ទីររូបនេះ បានបញ្ជាក់បន្ថែមថា៖ បច្ចុប្បន្នម៉ាស៊ីនបូមទឹក កម្លាំង៦៥សេស ចំនួន៦គ្រឿង របស់ក្រសួងធនធានទឹក និងឧតុនិយម ត្រូវបានក្រុមការងាររបស់មន្ទីរធនធានទឹកខេត្ត បញ្ជូនទៅបូមទឹក ជួយសង្គ្រោះដល់ដំណាំស្រូវ មិនប្រកាន់រដូវ ប្រមាណជា ២.១៦០ ហិកតា នៅភូមិថ្មដប់ ភូមិចែកអង្ករ និងភូមិស្រែព្រៃ នៅឃុំសំប៊ួរ ស្រុកមង្គលបូរី ខេត្តបន្ទាយមានជ័យ ឱ្យបានរួចផុតពីការខូច ជាបន្តបន្ទាប់។
លោក យឹម ប៊ុនរ៉ុម បានថ្លែបន្តថា៖ ស្រូវជាងពីរពាន់ហិកតាដែលស្ថិតនៅផ្នែក ខាងក្រោម ក្បែរបឹងទន្លេសាបនេះ មិនទាន់ខូច នៅឡើយទេ តែបើមិនបន្ថែមទឹកឱ្យ ស្រូវដែលជិតដល់ពេល ចេញផ្លែ ហើយនោះ ចេញផ្លែមិនរួច (មិនបានផលតែមិន ងាប់ទេ) ។ តំបន់ស្រូវស្ទើរទឹកនេះ មានប្រភពទឹក មិនខ្វះទេ តែកសិករមិនអាចទាញ យកមកប្រើបាន ដោយសារវាស្ថិត នៅក្នុងជម្រៅជ្រៅ មានតែក្រសួង ប្រើប្រាស់ ម៉ាស៊ីនធំបូម ដាក់ប្រឡាយមេ ហើយប្រជាពលរដ្ឋ បូមបន្តដោយម៉ាស៊ីនតូចៗ ដាក់ចូលស្រែ ដោយមកដល់ពេលនេះ ការជួយអន្តរាគមន៍រួចប្រមាណជា ៧០ភាគរយ ហើយ។ ហេីយពីរ-បី ថ្ងៃ ទៀត នឹងមានទឹកគ្រប់គ្រាន់ នៅក្នុងស្រែវិញ។
បន្ថែមពីនេះ ប្រធានមន្ទីរធនធានទឹករូបនេះ បានគូសបញ្ជាក់យ៉ាងដូច្នេះថា៖ រហូតមកទល់នឹងថ្ងៃទី៧ ខែកក្កដា ឆ្នាំ២០២១នេះ ការងារបង្កបង្កើនផល នៅក្នុងខេត្ត បន្ទាយមានជ័យ អនុវត្តបានប្រមាណជា ៩០ ភាគរយ នៃផែនការ ២៥៣.០០០ ហិកតាហើយ៕
ដោយ៖ អារុណះ
