សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ រដ្ឋបាលខណ្ឌដូនពេញ នៃរាជធានីភ្នំពេញ នៅថ្ងៃព្រហស្បតិ៍ ១៤រោច ខែបឋមសាឍ ឆ្នាំឆ្លូវ ត្រីស័ក ព.ស២៥៦៥ ត្រូវនឹងថ្ងៃទី០៨ ខែកក្កដា ឆ្នាំ២០២១ បានប្រារព្ធពិធីបិទបញ្ចប់យុទ្ធនាការចាក់វ៉ាក់សាំងបង្ការជំងឺកូវីដ-១៩ ក្នុងមូលដ្ឋានខណ្ឌដូនពេញ ក្រោមអធិបតីភាព លោក ហេង សុខគង តំណាងឱ្យលោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា, លោក លី ច័ន្ទភក្តី និង លោក សុខ ពេញវុធ អភិភិបាល នៃគណៈអភិបាលខណ្ឌដូនពេញ និង ដោយមានការចូលរួមពីតំណាងក្រុមគ្រូពេទ្យស្ម័គ្រចិត្តទាំង ១៨ក្រុម ស្មើរនឹង ១៨៥នាក់ចែកចេញជា ០៥មណ្ឌល សម្រាប់ខណ្ឌដូនពេញ ។
ក្នុងនោះគណៈអធិបតីបានធ្វើការកោតសសើរ និងថ្លែងអំណរគុណយ៉ាងជ្រាលជ្រៅបំផុត ដល់ក្រុមគ្រូពេទ្យស័្មគ្រចិត្ត នៃសម្ព័ន្ធគ្រូពេទ្យ ស.ស.យ.ក ដែល បានលះបង់ពេលវេលា កម្លាំងកាយចិត្ត ក្នុងការចូលរួមក្នុងយុទ្ធនាការចាក់វ៉ាក់សាំង
ជូនដល់ប្រជាពលរដ្ឋ ក្នុងមូលដ្ឋានខណ្ឌ។ បេសកកម្មនេះ គឺជាការចូលរួមលះបង់មិនអាចកាត់ថ្លៃបាន ដែលលោកគ្រូ អ្នកគ្រូពេទ្យបានលះបង់សេចក្តីសុខ សុភមង្គលផ្ទាល់ខ្លួន និងក្រុមគ្រួសារជាទីស្រលាញ់ ដើម្បីបុព្វហេតុជាតិ ប្រជាជន និងការស្ម័គ្រចិត្តចូលរួមប្រយុទ្ធប្រឆាំងជាមួយជំងឺកូវីដ១៩ ក្នុងគោលដៅការពារឱ្យបាននូវអាយុជីវិតប្រជាពលរដ្ឋកម្ពុជា ពីជំងឺកាចសាហាវដែលឆ្លងរាតត្បាតជាសកលមួយនេះ ។
ក្រោយបញ្ចប់ពិធីសំណេះ សំណាល គណៈអធិបតីបានប្រគល់ប័ណ្ណសរសើរ ជូនដល់លោកគ្រូពេទ្យ អ្នកគ្រូពេទ្យសរុបចំនួន ១៨រូប តំណាងអោយក្រុមគ្រូពេទ្យស្ម័គ្រចិត្ត ទាំង ១៨៥រូប ផងដែរ ។
ដោយឡែកលោក សុខ ពេញវុធ ក៏បានបញ្ជាក់ដែរថា ក្នុងនាមអាជ្ញាធរ និងក្នុងនាមប្រជាពលរដ្ឋខណ្ឌដូនពេញ យើងខ្ញុំសូមថ្លែងអំណរគុណយ៉ាងជ្រាលជ្រៅបំផុតជូនចំពោះ ក្រុមគ្រូពេទ្យស្ម័គ្រចិត្ត ដែលបានខិតខំប្រឹងប្រែងអស់ពីកម្លាំងកាយចិត្ត ក្នុងយុទ្ធនាការចាក់វ៉ាក់សាំងការពារជំងឺកូវីដ១៩ ជូនប្រជាពលរដ្ឋ ៕
ដោយ៖ស តារា
