សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្តាល៖ បេីយោងតាមរបាយការណ៍របស់សមត្ថកិច្ចនគរបាលខេត្តកណ្ដាលបានឱ្យដឹងថា កម្លាំងសមត្ថកិច្ចជំនាញបានឃាត់ខ្លួនជនសង្ស័យម្នាក់ដែលជាចោរឆក់ខ្សែក ខណៈដែលរូបគេបានធ្វើសកម្មភាពឆក់យកខ្សែកពីអ្នកធ្វើដំណើរ ប៉ុន្ដែមិនបានសម្រេច បង្កការភ្ញាក់ផ្អេីលកាលពីវេលាម៉ោង៨និង៣០នាទីព្រឹកថ្ងៃទី១០ ខែកក្កដា ឆ្នាំ២០២១ នៅចំណុចផ្លូវ៥០ម៉ែត្រ ភូមិបត្តាជី សង្កាត់ព្រែកហូរ ក្រុងតាខ្មៅ ខេត្តកណ្តាល ។របាយការណ៍ដដែលបន្តថា នារីរងគ្រោះ(មិនស្គាល់អត្តសញ្ញាណ ក្រោយកេីតហេតុបានគេចខ្លួនបាត់)។ ចំណែកជនសង្ស័យឈ្មោះសុខ វ៉ា ភេទប្រុស អាយុ២១ឆ្នាំ ជនជាតិខ្មែរ មានទីលំនៅភូមិព្រែករាំង សង្កាត់កំពង់សំណាញ់ ក្រុងតាខ្មៅ ខេត្តកណ្តាល មុខរបរមិនពិតប្រាកដ។
ប្រភពដដែលបានបន្ថែមទៀតថា នៅមុនពេលកេីតហេតុ ជនរងគ្រោះកំពុងតែជិះម៉ូតូតាមផ្លូវ៥០ម៉ែត្រឆ្ពោះមកស្ពានព្រែកហូរ ស្រាប់តែជនសង្ស័យជិះម៉ូតូមកពីក្រោយដល់ទន្ទឹមក៏ធ្វើសកម្មភាពឆក់យកខ្សែ.ក តែពុំបានសម្រេចទេ ដោយម៉ូតូប៉ះគ្នាបណ្តាលដួល ហើយភ្លាមៗនោះជនសង្ស័យបានរត់ចោលម៉ូតូ ចំណែកជនរងគ្រោះបានជិះម៉ូតូមករាយការណ៍ប្រាប់សមត្ថកិច្ចគោលដៅភ្លើងស្តុបព្រែកហូរ ក្នុងពេលនោះជនសង្ស័យក៏ត្រឡប់មកយកម៉ូតូរបស់ខ្លួនវិញតែជិះមិនកើតបានហៅម៉ូតូកង់បីដឹកមកដល់ភ្លើងស្តុបព្រែកហូរត្រូវបានសមត្ថកិច្ចហៅសួរនាំ ស្រាប់តែជនសង្ស័យបានរត់គេចខ្លួនចូលទៅក្នុងទឹកស្ទឹងក្រោមស្ពានព្រែកហូរ ក៏ត្រូវសមត្ថកិច្ចឃាត់ខ្លួនបានបញ្ជូនមកកាន់អធិការដ្ឋាននគរបាលក្រុងតាខ្មៅ ដើម្បីសាកសួរនិងកសាងសំណុំរឿងតាមនីតិវិធី៕
ដោយ៖ ជ្រោយពេជ្រ
