សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ផ្ទះប្រជាពលរដ្ឋមួយកន្លែងនៅជាន់ទី៤ត្រូវបានអគ្គិភ័យឆាបឆេះហើយរាលដាលដល់កំប៉ុងហ្គាសធ្វើឱ្យផ្ទុះ តែសំណាងល្អមិនបណ្តាលមានមនុស្សរងរបួសឡើយ ត្រូវបានអាជ្ញាធរចេញជួយធ្វើអន្តរាគមន៍ទាន់ពេល។
ហេតុការណ៍នេះកើតឡើងកាលពីវេលាម៉ោង១០ព្រឹកថ្ងៃទី១២ ខែកក្កដា ឆ្នាំ២០២១ នៅចំណុចផ្ទះលេខ១៩E4 ជាន់ទី៤ តាមបណ្ដាយផ្លូវលេខ១១៨ សង្កាត់ផ្សារដេប៉ូទី៣ ខណ្ឌទួលគោក។
តាមប្រភពព័ត៌មានបានឱ្យដឹងថា នៅមុនពេលកើតហេតុម្ចាស់ផ្ទះមិនបាននៅផ្ទះទេ គឺបានចេញទៅធ្វើការតាំងពីព្រលឹម លុះក្រោយមក ក៏ស្រាប់តែអ្នកផ្ទះជិតខាងឃើញមានផ្សែងហុយចេញពីខាងក្នុងផ្ទះ ក៏នាំគ្នាយកបំពង់ពន្លត់អគ្គិភ័យបាញ់ពន្លត់តែមិនអាចគ្រប់គ្រងបានក៏រាយការណ៍ទៅអាជ្ញាធរឱ្យជួយហៅរថយន្តពន្លត់អគ្គិភ័យមកជួយធ្វើអន្តរាគមន៍បានទាន់ពេលវេលា។
ពេលភ្លើងកំពុងឆេះនោះកម្លាំងជំនាញការិយាល័យបង្ការពន្លត់អគ្គិភ័យ និងសង្គ្រោះនៃស្នងការដ្ឋាននគរបាលរាជធានីភ្នំពេញ បានចេញរថយន្តទៅដល់ទីតាំងកើតហេតុចំនួន៥គ្រឿង ប្រើប្រាស់ទឹកអស់ចំនួន២គ្រឿងពន្លត់រលត់ជាស្ថាពរ។ មូលហេតុសមត្ថកិច្ចជំនាញសន្និដ្ឋានជាជំហានដំបូង សង្ស័យម្ចាស់ផ្ទះភ្លេចបិទចង្ក្រានហ្គាស រួចចេញទៅធ្វើការ៕
ដោយ ៖ រ៉ារ៉ា
