សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ កម្លាំងសមត្ថកិច្ចខណ្ឌចំការមនបានធ្វេីការដេញចាប់ជនសង្ស័យ២នាក់តាំងពីរង្វង់មូលផ្សារដេីមថ្កូវ រហូតឃាត់ខ្លួនបាននៅជាប់របងមន្ទីរពេទ្យមិត្តភាពខ្មែរ-សូវៀត និងដកហូតវត្ថុតាងសត្វឆ្កែ១ក្បាល។ហេតុការណ៍នេះ បង្កការភ្ញាក់ផ្អេីលកាលពីវេលាម៉ោង១ និង៥០នាទីរំលងអធ្រាត្រឈានចូលថ្ងៃទី១៦ ខែកក្កដា ឆ្នាំ២០២១ ស្ថិតក្នុងសង្កាត់ទំនប់ទឹក ខណ្ឌបឹងកេងកង រាជធានីភ្នំពេញ ។
ជនសង្ស័យទាំង២នាក់ដែលសមត្ថកិច្ចឃាត់ខ្លួនបានរួមមាន៖ ទី១-ឈ្មោះ វិត ភេទប្រុស អាយុ៤៣ឆ្នាំ និងទី២-ឈ្មោះ ស្នា ភេទប្រុស អាយុ៣០ឆ្នាំ ។ អ្នកទាំងពីរមានមុខរបរមិនពិតប្រាកដ ស្នាក់នៅក្បែរស្ពានអាកាសស្ទឹងមានជ័យ ក្នុងសង្កាត់ស្ទឹងមានជ័យ២ ខណ្ឌមានជ័យ ។
តាមប្រភពពីសមត្ថកិច្ចដែលដេញឃាត់ចាប់ជនសង្ស័យខាងលេីបានប្រាប់ឱ្យដឹងថា មុនកេីតហេតុកម្លាំងរបស់លោកបានជិះម៉ូតូល្បាតក្នុងភូមិសាស្ត្ររបស់ខ្លួនក៏ប្រទះឃេីញជនសង្ស័យ២នាក់ជិះម៉ូតូមួយគ្រឿងម៉ាក SUZUKI ស្មាស់ ពណ៌ក្រហម ពាក់ស្លាកលេខភ្នំពេញ 1AA-6849 និងបីសត្វឆ្កែពណ៌ខ្មៅ១ក្បាលមានទាំងខ្សែលួសជាប់នឹងខ្លួនសត្វផង ទេីបមានការសង្ស័យក៏ហៅឲ្យឈប់ តែជនសង្ស័យទាំង២នាក់នោះមិនឈប់ ធ្វេីឲ្យសមត្ថកិច្ចដេញតាមតាំងពីរង្វង់មូលផ្សារដេីមថ្កូវ ខណ្ឌចំការមន រហូតឃាត់ខ្លួនជនសង្ស័យទាំង២នាក់នេះបាននៅជាប់របងមន្ទីរពេទ្យមិត្តភាពខ្មែរ-សូវៀត តាមបណ្ដោយផ្លូវលេខ១៨៧ ក្នុងសង្កាត់ទំនប់ទឹក ខណ្ឌបឹងកេងកង រួមទាំងចាប់យកវត្ថុតាងសត្វឆ្កែ១ក្បាលផងដែរ ។
ក្រោយពេលឃាត់ខ្លួនជនសង្ស័យខាងលេីបានភ្លាម សមត្ថកិច្ចបាននាំជនសង្ស័យទាំង២នាក់ និងវត្ថុតាងទៅកាន់អធិការដ្ឋាននគរបាលខណ្ឌចំការមន ដេីម្បីចាត់ការបន្តតាមនីតិវិធី ៕
ដោយ ៖ ភារ៉ា ដង្កោ
