សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ចាម ៖ រូបភាពនេះបង្ហាញពីទម្លាប់អាក្រក់បំផុតរបស់ម្ចាស់ការដ្ឋានខ្លះ ដែលគ្មានគិតពីការលំបាករបស់អ្នកដទៃ គឺគិតតែប្រយោជន៍ខ្លួនឯង សំខាន់ឱ្យតែបានលុយដោយមិនខ្វល់ពីអនាម័យ បរិស្ថាន សោភណភាពក្នុងទីក្រុងនោះទេ ខណ:ដែលអាជ្ញាធរពាក់ព័ន្ធក៏មិនខ្វល់ពីការទទួលខុសត្រូវក្នុងដែនសមត្ថកិច្ចរបស់ខ្លួនដែរ។
កង្វល់ក្នុងចិត្តរបស់ប្រជាពលរដ្ឋរស់នៅមូលដ្ឋានភូមិផ្សារថ្មី(ផ្សារលើ) ឃុំពាមប្រធ្នោះ ស្រុកកោះសូទិនអំពីរឿងកំណកដីដ៏ក្រាស់នៅលើផ្លូវបេតុងនេះ ពួកគាត់បានធ្វើសំណូមពរទៅអាជ្ញាធរខេត្តកំពង់ចាម សូមមេត្តាជួយពិនិត្យមើលផ្លូវបេតុងមួយខ្សែឆ្លងកាត់ភូមិផ្សារថ្មី(ផ្សារលើ)ឃុំពាមប្រធ្នោះ ស្រុកកោះសូទិន នេះផង ព្រោះពួកឈ្មួញរកសុីដឹកដីកពុងតែបំផ្លាញផ្លូវនិងបង្កគ្រោះថ្នាក់ដល់អ្នកធ្វើដំណើរជាខ្លាំង។
បញ្ហានេះប្រជាពលរដ្ឋបានលេីកឡេីងថា អ្នកធ្វើដំណើរតាមផ្លូវបានធ្វើការរិះគន់ទៅលើក្រុមហ៊ុនរកស៊ីដឹកដី និងអាជ្ញាធរមូលដ្ឋានថា មិនបានយកចិត្តទុកដាក់ នាំឲ្យផ្លូវបេតុងមួយខ្សែនេះពោរពេញដោយកំណកដី ដែលនាំឲ្យអ្នកជិះម៉ូតូរអិលដួលស្ទើរតែគ្រប់ៗគ្នា ពេលខ្លះអាចប្រឈមនឹងគ្រោះថ្នាក់ចរាចរណ៍បាត់បង់ជីវិតក៏អាចថាបានដែរ ។
ទិដ្ឋភាពនៃការអាចនឹងនាំឱ្យកេីតមានគ្រោះថ្នាក់ចរាចរណ៍នេះត្រូវបានប្រជា ពលរដ្ឋថតរូបទុកជាវត្ថុតាងដេីម្បីស្នេីទៅលោកអភិបាលខេត្តមេត្តាជួយមើលផង ព្រោះថ្នល់បេតុងមានដីកម្រាស់ជិត១តឹកហើយ អាជ្ញាធរដូចមិនរវល់សោះ(យ៉ាងណាក៏គួរស្រោចទឹកឬកៀរដីចេញខ្លះផង ទោះបីភ្លៀងយប់ក៏ថ្ងៃហុយដែរ) ឬមួយអាងអាជីវកម្មមានច្បាប់? សូមមេត្តាយល់ពីសិទ្ធិរស់នៅរបស់ប្រជាពលរដ្ឋផង៕
ដោយ ៖ វណ្ណៈ
