ព័ត៌មានទាន់ហេតុការណ៍៖

រដ្ឋបាលខេត្តបន្ទាយមានជ័យ បិទខ្ទប់ទីតាំងផ្សារហ៊ុយឡេងបន្ទាប់ពីរកឃើញអ្នកវិជ្ជមានជំងឺកូវីដ-១៩ចំនួន១០នាក់

ចែករំលែក៖

ខេត្តបន្ទាយមានជ័យ៖ អាជ្ញាធរ ខេត្តបន្ទាយមានជ័យ  បានសម្រេចបិទខ្ទប់ផ្សារលក់បន្លែ  ត្រី សាច់មួយកន្លែង ”  ផ្សារ  ហ៊ុយឡេង) ស្ថិតនៅភូមិគោរដ្ឋាន  សង្កាត់អូរអំបិល  ក្រុងសិរីសោភ័ណ  បន្ទាប់ពីមានករណីរកឃើញវិជ្ជមានកូវីដ-១៩  នៅរសៀលថ្ងៃទី១៨  ខែកក្កដា  ឆ្នាំ ២០២១ ម្សិលមិញនេះ។ 

ក្រោយពីមានការរកណីរកឃើញវិជ្ជមាន ហើយក៏បានសម្រេចបិទខ្ទប់ផ្សារខាងលើ  ដែលដឹកនាំដោយផ្ទាល់  លោក  អ៊ុំ  រាត្រី  អភិបាលខេត្ត  នឹងជាប្រធានគណៈបញ្ជការឯកភាពខេត្ត បន្ទាយមានជ័យ  រួមនឹងលោក  ហ៊ឹល  រ៉ាយ៉ា  អភិបាលក្រុង សិរីសោភ័ណ  កងកម្លាំង បានចុះបិទច្រកចេញចូលផ្សារខាងលើ  ដើម្បីប្រមូលបងប្អូនអាជីវករលក់ដូរក្នុងផ្សារនិងអ្នកពាក់ព័ន្ធផ្សេងទៀត ដើម្បីយកសំណាកធ្វើតេស្តរហ័សរកកូវីដ-១៩ (Rapid  Test ) នឹងបានដាក់ចេញនូវវិធានការបន្ទាន់  ដើម្បីទប់ស្កាត់ការឆ្លងរីករាលដាលកូវីដ-១៩ចូលក្នុងសហគមន៍។ 

តាមការបញ្ជាក់ពី លោក  ហ៊ឹល  រ៉ាយ៉ា  អភិបាលក្រុង សិរីសោភ័ណ  បានឲ្យដឹងថា  ៖  គិតត្រឹម ល្ងាចថ្ងៃទី១៨  ខែកក្កដា ឆ្នាំ២០២១នេះ  អាជ្ញាធរបានប្រមូលអ្នកពាក់ព័ន្ធ  ទាំងអាជីវករដែលលក់ក្នុងផ្សារ ហ៊ុយឡេង  មានចំនួន៤៤៦នាក់/២៩២នាក់ ក្រោយពីបានធ្វើតេស្តរហ័ស  (Rapid Test)  លទ្ធផលរកឃើញវិជ្ជមានកូវីដ-១៩  ចំនួន១០នាក់/ស្រី៦នាក់។

ជាមួយគ្នានោះ លោក  អ៊ុំ  រាត្រី  ក៏បានអំពាវនាវដល់ពលរដ្ឋទាំងអស់ត្រូវមានប្រុងប្រយ័ត្នឲ្យបានខ្ពស់ពីការចម្លងជម្ងឺកូវីដ-១៩ចូលក្នុងក្រុមគ្រួសារ  និងសហគមន៍  ដោយត្រូវប្រកាន់ភ្ជាប់នូវវិធានការ  “៣ការពារ  ៣កុំ ”  ឲ្យបានគ្រប់ពេល  ពិសសសូមបងប្អូនចូលរួមចាក់វ៉ាក់សាំងការពារជម្ងឺកូវីដ-១៩ទាំងអស់គ្នា  ក៏ដូចជារួមគ្នាទប់ស្កាត់ការឆ្លងរីករាលដាលជម្ងឺកូវីដ-១៩។ 

សូមបញ្ជាក់ផងដែរថា៖  នៅថ្ងៃទី១៨  ខែកក្កដា នេះ  រដ្ឋបាលខេត្តបន្ទាយមានជ័យ បានបង្ហាញអត្តសញ្ញាណបុគ្គលវិជ្ជមានកូវីដ-១៩  ចំនួន៨៨នាក់  ក្នុងក៏មានអ្នកជាសះស្បើយចំនួន៣៦៨នាក់ ។ ចាប់ពីមានព្រឹត្តិការសហគមន៍  ២០  កុម្ភៈ មក  គិតត្រឹម យប់ថ្ងៃទី១៨  ខែកក្កដា  អ្នកស្លាប់ដោយសារកូវីដ-១៩ ចំនួន ៦១នាក់/ស្រី២៩នាក់៕

ដោយ ៖ វណ្ណា


ចែករំលែក៖