សារព័ត៌មាន នគរវត្ត តែងតែនាំមុខគេជានិច្ច
លោក Nuno Espirito Santo អ្នកចាត់ការទូទៅរបស់ក្រុម Tottenham បានចេញការព្រមានចំពោះក្លិបដែលចាប់អារម្មណ៍នឹង Harry Kane ចំពេលមានការសង្ស័យអំពីអនាគតរបស់ប្រធានក្រុមជម្រើសជាតិអង់គ្លេសរូបនេះ។
Harry Kane ត្រូវបានគេរាយការណ៍ថា ចង់ចាកចេញពីក្លិបរបស់គាត់នៅរដូវក្តៅនេះដើម្បីស្វែងរកពានរង្វាន់ដំបូងនៃអាជីពរបស់គាត់។ ទោះបីជាការខិតខំប្រឹងប្រែងរបស់ Kane ក្នុងការឈ្នះស្បែកជើងមាសក្របខ័ណ្ឌ Premier League កាលពីរដូវកាលមុនក៏ដោយក៏ Spurs បានខកខានមិនបានប្រកួតបាល់ទាត់ក្របខ័ណ្ឌ Champions League សម្រាប់២រដូវកាលជាប់ៗគ្នា។
ការបរាជ័យចុងក្រោយរបស់អង់គ្លេសក្នុងព្រឹត្តិការណ៍យូរ៉ូ២០២០ពីសំណាក់ក្រុមអុីតាលីលើបាល់ប៉េណាល់ទីមានន័យថា កីឡាករវ័យ២៧ឆ្នាំរូបនេះនៅតែមិនទាន់ទទួលបានពានរង្វាន់ធំមួយក្នុងអាជីពរបស់គាត់សម្រាប់ក្លិប ឬប្រទេស។
ម្ចាស់ជើងឯក Premier League ក្រុម Manchester City ត្រូវបានផ្សារភ្ជាប់យ៉ាងខ្លាំងជាមួយនឹងការផ្លាស់ប្តូរសម្រាប់ Harry Kane ខណៈដែលពួកគេកំពុងសម្លឹងមើលដើម្បីជំនួសកីឡាករ Sergio Aguero ដែលបានផ្លាស់ទៅលេងនៅ Barcelona ក្នុងការផ្ទេរដោយឥតគិតថ្លៃ។
ព័ត៌មាននេះ លោក Nuno ដែលជាអតីតគ្រូបង្វឹកក្រុម Wolves ដែលត្រូវបានតែងតាំងជាអ្នកស្នងតំណែងជំនួសលោក Jose Mourinho កំពុងរំពឹងថា ទ្រព្យសម្បត្តិដ៏មានតម្លៃរបស់គាត់នឹងវិលត្រឡប់មកកាន់ក្រុម Tottenham សម្រាប់ការហ្វឹកហាត់មុនបើករដូវកាលបន្ទាប់ពីការសម្រាកមួយរយៈខ្លីនៃការខិតខំប្រឹងប្រែងរបស់គាត់នៅក្នុងព្រឹត្តិការណ៍អឺរ៉ុប។
គ្រូបង្វឹកសញ្ជាតិព័រទុយហ្គាល់រូបនេះដែលត្រូវបានតែងតាំងជាផ្លូវការកាលពីថ្ងៃទី៣០ ខែមិថុនាបាននិយាយថា “Harry Kane គឺជាកីឡាកររបស់យើង ដែលនោះគឺជារយៈពេលមិនចាំបាច់និយាយអ្វីផ្សេងទេ។ពេលនេះគឺជាពេលវេលាសម្រាប់ Harry Kane ដើម្បីស្តារថាមពលរបស់គាត់ឡើងវិញ ហើយនៅពេលដែល Harry Kane ត្រឡប់មកម្តងទៀតយើងនឹងមានពេលសន្ទនាគ្នាល្អ។
លោក Nuno បន្តថា “ខ្ញុំកំពុងទន្ទឹងរង់ចាំគាត់ចូលរួមជាមួយក្រុម ហើយចាប់ផ្តើមធ្វើការជាមួយគ្នា។ ខ្ញុំពិតជារំភើបក្នុងការធ្វើការជាមួយកីឡាករទាំងអស់។ Harry Kane គឺជាកីឡាករកំពូល, Harry Kane គឺជាកីឡាករឆ្នើមម្នាក់នៅលើពិភពលោក នោះគឺជាអ្វីដែលត្រូវនិយាយ”។
លោក Nuno កំពុងធ្វើការក្រោមការដឹកនាំរបស់លោក Fabio Paratici ជានាយកក្លិបថ្មី ប៉ុន្តែការផ្លាស់ប្តូររដូវក្តៅដែលរំពឹងទុករបស់ក្រុម Spurs គឺចាប់ផ្តើមយឺតដោយមិនមានការចុះហត្ថលេខាលើកីឡាករថ្មីៗនៅឡើយ។
ការប្រកួតប្រជែងដំបូងរបស់លោក Nuno គឺនៅសល់តែជាង៤សប្តាហ៍ទៀតប៉ុណ្ណោះ ដោយក្រុម Tottenham ត្រូវទទួលស្វាគមន៍ក្រុមម្ចាស់ជើងឯក Man City ក្នុងរដូវកាលថ្មីក្របខ័ណ្ឌ Premier League ២០២១–២០២២ នាថ្ងៃទី១៥ ខែសីហាខាងមុខ ៕
ដោយ៖ ភារៈ(រូបភាព៖ AFP)
