សារព័ត៌មាន នគរវត្ត តែងតែនាំមុខគេជានិច្ច
ខេត្តព្រះវិហារ ៖ លោក ហេង រតនា អគ្គនាយកសុីម៉ាក បានថ្លែងថា, កំលាំងអង្គភាពសុីម៉ាក់ក៏មិនខុសប្លែកពីកំលាំងជួរមុខដទៃទៀតដែរ ក្នុងកិច្ចការប្រចាំថ្ងៃរបស់ខ្លួនបានប្រឈមមុខការឆ្លងវីរុសកូវីដ-១៩។ ជាក់ស្តែងគិតមកដល់ថ្ងៃទី២២ ខែកក្កដា ឆ្នាំ២០២១នេះ មានមន្ត្រីអង្គភាពចំនួន៩នាក់បានឆ្លងជំងឺកូវីដ-១៩ ក្នុងនោះនៅទិសខេត្តបាត់ដំបងចំនួន៣នាក់ ភ្នំពេញចំនួន២នាក់ និងនៅទិសខេត្តព្រះវិហារចំនួន៤នាក់ (នៅក្នុងសហគមន៍ស្រអែម)។ អង្គភាពសុីម៉ាក់បានចាត់ចែងឱ្យមានក្រុមការងារប្រយុទ្ធប្រឆាំងកូវីដ-១៩ ដែលមានភារកិច្ចគ្រប់គ្រងនិងត្រួតពិនិត្យបញ្ហាកូវីដ-១៩ ពាក់ព័ន្ធមន្ត្រីក្នុងអង្គភាពយ៉ាងមានប្រសិទ្ធភាពខ្ពស់។ អង្គភាពសុីម៉ាក់បានរៀបចំនិងអនុវត្តផែនការយុទ្ធសាស្ត្របំរ៉ុងទុកជាមុនក្នុងការទប់ទល់នឹងករណីមានការឆ្លងកូវីដ-១៩ ចូលកំលាំងរបស់ខ្លួន ដោយធ្វេីយ៉ាងណារក្សាឱ្យបាននិរន្តភាពប្រតិបត្តិការរបស់ខ្លួនជាប្រក្រតី បេីទោះបីជាមានកំលាំងខ្លះរងផលប៉ះពាល់ក៏ដោយ ។ យុទ្ធសាស្ត្រទាំងនោះរួមមាន ការបំបែកកំលាំងប្រតិបតិ្តតូចៗស្ថិតនៅភូមិសាស្ត្រដាច់ៗពីគ្នា បែងចែកវេនប្រតិបតិ្តការ កាត់បន្ថយការចល័តកំលាំង យន្តការត្រួតពិនិត្យកំលាំងតាមប្រព័ន្ធអេឡិចត្រូនិច …, ករណីមានការសង្ស័យចាត់វិធានការតេស្តរហ័សកំលាំងទាំងអស់ដែលពាក់ព័ន្ធ ញែកកំលាំងឱ្យរស់នៅដាច់ពីគ្នាជាដេីម។ ល។ លោកបន្តថា, យុទ្ធសាស្ត្រទាំងនេះលំបាក ប៉ុន្តែត្រូវតែរៀនរស់នៅនិងប្រតិបត្តិការក្រោមការគំរាមកំហែងដោយកូវីដ-១៩ នេះជាពិសេសយកវិធាន ៣ការពារនិង៣កុំជាឆ្អឹងខ្នងនៃអនុវត្តយុទ្ធវិធីក្នុងទប់ទល់កូវីដ-១៩ នេះ ។
ទោះបីជាមានការឆ្លងកូវីដ-១៩ ក៏ដោយក៏បញ្ហាសុខភាពមន្ត្រីទាំង៩រូបខាងលេីគ្មានបញ្ហាឡេីយ ដោយបានជាសះស្បេីយនិងឆ្លងកំរិតស្រាល។ សូមគោរពអរគុណសម្តេចតេជោដែលបានផ្តល់វ៉ាក់សាំងសំរាប់មន្ត្រីជួរមុខសុីម៉ាក់ក្នុងកញ្ចប់អាទិភាពនិងជួយការពារអាយុជីវិតមន្ត្រីទាំងអស់ពីឈឺធ្ងន់ធ្ងរ។
មន្ត្រីដែលឆ្លងជំងឺកូវីដ-១៩ ទាំងអស់ក៏បានទទួលរបបឧបត្ថម្ភជាអំណោយរបស់សម្តេចតេជោ រួមមានអង្ករមួយបាវ៥០គីឡូក្រាម មី ត្រីខ និងថវិកា៤០មុឺនរៀលផងដេីម្បីទ្រទ្រង់ជីវភាពរស់នៅ។ ទន្ទឹងនឹងនេះអង្គភាពបានរក្សានូវរាល់របបឧបត្ថម្ភប្រចាំខែទាំងអស់ជាធម្មតាជូនបងប្អូនក្នុងកំឡុងពេលសំរាកព្យាបាលនិងចត្តាឡីស័ក ៕
ដោយ ៖ សិលា
