សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ទីរួមផ្សារកណ្ដាល នឹងបើកដំណើរការឡើងវិញ ក្រោយបិទដោយសារពាក់ព័ន្ធអ្នកកើតជំងឺកូវីដ-១៩ ។ នេះបើយោងតាមការបញ្ជាក់ឱ្យដឹងពីរដ្ឋបាលសាលាខណ្ឌដូនពេញ រាជធានីភ្នំពេញ នៅព្រលប់ថ្ងៃទី២៦ ខែកក្កដាឆ្នាំ ២០២១។
រដ្ឋបាលសាលាខណ្ឌដូនពេញ បានបន្តថា, បើទោះបីអនុញ្ញាតឲ្យបើកដំណើរការឡើងវិញក៏ពិតមែន ប៉ុន្ដែ រដ្ឋបាលរាជធានីភ្នំពេញ និង រដ្ឋបាលខណ្ឌដូនពេញ បានកំណត់គោលការណ៍ និង ណែនាំដល់គណៈកម្មការផ្សារ អាជីវករ និងភ្ញៀវដែល ចេញចូលផ្សារ ត្រូវចូលរួម ការពារ និងទប់ស្កាត់ការឆ្លងរីករាលដាលជាថ្មី នៃជំងឺកូវីដ-១៩ នេះ ។
សូមបញ្ជាក់ថា, បើយោងតាមសេចក្ដីជូនដំណឹងរបស់ក្រសួងសុខាភិបាលកម្ពុជា នៅរសៀលថ្ងៃចន្ទទី២៦ ខែកក្កដា ឆ្នាំ២០២១នេះ បានបញ្ជាក់ពីការរកឃើញករណីវិជ្ជមានវីរុសកូវីដ-១៩ថ្មីចំនួន ៧៧៨នាក់ ខណៈឣ្នកជាសះស្បើយចំនួន ៦៨៦នាក់ និងករណីស្លាប់ ២២នាក់។
សូមជម្រាបថា នៅក្នុងសេចក្ដីជូនដំណឹងរបស់ក្រសួងសុខាភិបាល នៅថ្ងៃទី២៥ ខែកក្កដា ឆ្នាំ២០២១ រកឃើញអ្នកឆ្លងថ្មី ៧៧៨នាក់ទៀត ជាសះស្បើយ ៦៨៦នាក់ និងស្លាប់ ២២នាក់៖
– ករណីឆ្លងសហគមន៍ ៣០៣នាក់
– អ្នកដំណើរពីបរទេស ៤៧៥នាក់
គិតត្រឹមព្រឹក ថ្ងៃទី២៦ ខែកក្កដា ឆ្នាំ២០២១
– អ្នកឆ្លងសរុប= 73,701 នាក់
– អ្នកជាសះស្បើយ= 65,950 នាក់
– អ្នកស្លាប់= 1,305 នាក់៕
ដោយ ៖ សិលា
