សារព័ត៌មាន នគរវត្ត តែងតែនាំមុខគេជានិច្ច
ខេត្តកែប ៖ កាលពីថ្ងៃទី២៦ ខែសីហា ឆ្នាំ២០២១ ម្សិលមុិញនេះ សំណង់ខឿនលួចសង់ចូលទៅក្នុងសមុទ្រ ប្រុងនឹងវាទយកធ្វើកម្មសិទ្ធិមួយកន្លែង ស្ថិតនៅភូមិអង្កោល ឃុំអង្កោល ស្រុកដំណាក់ចង្អើរ ខេត្តកែប ត្រូវអាជ្ញាធរចុះទៅវាយកម្ទេចចោលគ្មានសល់។ ប៉ុន្តែគេពុំទាន់បញ្ជាក់ពីអត្តសញ្ញាណជនរំលោភយកសមុទ្រនោះនៅឡើយទេ អាចជាអ្នកមានមុខមានមាត់ក្នុងខេត្តនេះ។
បើយោងទៅតាមប្លង់ ការរៀបខឿនចូលសមុទ្រពីសំណាក់ជនអនាមិក(គេនៅលាក់ឈ្មោះ)នេះ មានទំហំរហូត ១.៤៥៨ម៉េត្រការ៉េឯណោះ។
ដោយឡែកលោកស្រី គឹម ចន្នី អភិបាលស្រុកដំណាក់ចង្អើរ បានឲ្យដឹងថា, ការរៀបខឿននេះ គឺរំលោភចូលសមុទ្រជាទ្រព្យសម្បត្តិរបស់រដ្ឋទាំងស្រុង តែលោកស្រីមិនអាចបញ្ជាក់ថា ជននៅពីក្រោយរឿងនេះ ជានរណានោះទេ ដោយលោកស្រីថា «មិនស្គាល់ទេ»។
នៅជុំវិញឆ្នេរអង្កោល ការរៀបខឿនចូលសមុទ្រ ដើម្បីទន្រ្ទានធ្វើជាកម្មសិទ្ធិ មិនមែនជារឿងដែលទើបតែកើតឡើងថ្មីៗនោះទេ កន្លងមកករណីដូចគ្នានេះ បានកើតឡើងជាញឹកញយដង ហើយកន្លែងខ្លះក៏ជោគជ័យ កន្លែងខ្លះក៏ទើបតែរៀបហើយថ្មីៗ តែមិនទាន់ឃើញវិធានការរបស់រដ្ឋបាលស្រុក ក៏ដូចជារដ្ឋបាលខេត្ត ចាត់ចែងយ៉ាងណាចំពោះបញ្ហានេះនៅឡើយ។
យ៉ាងណាក៏ដោយចំពោះវិធានការរបស់អាជ្ញាធរថ្មីៗនេះ ប្រជាពលរដ្ឋនៅជាប់តំបន់ឆ្នេរ បានសម្តែងការសាទរ ចំពោះការអនុវត្តច្បាប់របស់អាជ្ញាធរ តែពួកគាត់សំណូមពរ សូមឲ្យអាជ្ញាធរមានសមត្ថកិច្ចបន្តធ្វើបែបនេះទៅកន្លែងដទៃទៀតផង។
សូមបញ្ជាក់ផងដែរថា, ចំពោះបញ្ហាខាងលើនេះ ទោះជាលោកស្រីដាក់ភិបាលស្រុក បានអះអាងថាមិនស្គាល់អត្តសញ្ញាណអ្នកលួចសាងសង់នេះក៏ដោយ ប៉ុន្តែជាអំពើល្មើសច្បាប់របស់ជនខិលខូច រំលោភចូលសមុទ្រជាទ្រព្យសម្បត្តិរបស់រដ្ឋទាំងស្រុង ។ ដូច្នេះត្រូវតែមានវិធានការផ្លូវច្បាប់ ពីអាជ្ញាធរក៏ដូចជាមន្ត្រីនគរបាលយុត្តិធម៌ ដើម្បីរកមុខឲ្យឃើញធ្វើការដោះស្រាយចំពោះមុខច្បាប់ ដើម្បីជាវិធានការលុបបំបាត់នូវនិទណ្ឌភាព នៃការប្រព្រឹត្តបទល្មើសរបស់បុគ្គលមួយចំនួនដែលតែងតែប្រព្រឹត្តបែបនេះជាញឹកញាប់កន្លងមក ហើយគ្មានទោសទណ្ឌ ទើបពួកគេនៅហ៊ានប្រព្រឹត្តបទល្មើស ៕
ដោយ ៖ សិលា
