សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរសម្នាក់សង្ស័យស្រវឹងស្រាបានបើករថយន្តហាយឡេនឌ័រមួយគ្រឿងយ៉ាងលឿនដូចហោះហេីយរេចង្កូតមកបញ្ច្រាសផ្លូវជ្រុលទៅបុកបង្គោលភ្លើងពេញទំហឹងបណ្ដាលឲ្យបាក់រាបដល់ដី ហើយរថយន្តក្រឡាប់ផ្ងារជើងទ្រមេឃសង្កត់ដេីមឈេីមួយដេីមទៀតផងដែរ តែតៃកុងរងរបួសស្រាល។
ហេតុការណ៍គ្រោះថ្នាក់ចរាចរណ៍នេះបានកើតឡើងកាលវេលាម៉ោង១០ និង២០នាទីយប់ថ្ងៃសុក្រ ទី២៧ ខែ សីហា ឆ្នាំ២០២១ ស្ថិតនៅតាមបណ្ដោយផ្លូវ៦០ម៉ែត្រជិតសាលាខណ្ឌមានជ័យ ក្នុងសង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ ។
តាមប្រភពព័ត៌មានពីកន្លែងកើតហេតុបានឲ្យដឹងថា, មុនពេលកើតហេតុគេឃើញបុរសម្នាក់សង្ស័យស្រវឹងស្រាបានបើករថយន្តមួយគ្រឿងម៉ាក ហាយឡេនឌ័រ ពណ៌ប្រផេះ ពាក់ស្លាកលេខភ្នំពេញ2BK 9687ធ្វើដំណើរតាមបណ្ដោយផ្លូវ៦០ម៉ែត្រ ទិសដៅពីត្បូងទៅជើងក្នុងល្បឿនលឿនដូចហោះ ខណៈមកដល់ចំណុចកើតហេតុខាងលើបានរេចង្កូតមកខាងឆ្វេងដៃបញ្ច្រាសផ្លូវ ជ្រុលទៅបុកបង្គោលភ្លើងបាក់អស់មួយដេីម ឯរថយន្តបង្កក្រឡាប់ផ្ងារជើងឡើងលើមកសង្កត់ដេីមឈេីបាក់អស់មួយដេីមទៀត ។
ភ្លាមៗនោះដែរតៃកុងរថយន្តបង្កបានលូនចេញពីរថយន្ត ដោយស្ថានភាពរបួសស្រាល។
ក្រោយកើតហេតុ សមត្ថកិច្ចជំនាញចរាចរណ៍ខណ្ឌមានជ័យបានចុះមកដល់ចំណុចកើតហេតុ និងបានទាក់ទងបន្តទៅសមត្ថកិច្ចជំនាញក្រុងភ្នំពេញ ចុះធ្វេីការវាស់វែងនិងស្ទួចយករថយន្តបង្កទៅរក្សាទុកនៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ រងចាំម្ចាស់ចូលខ្លួនដោះស្រាយតាមច្បាប់៕
ដោយ ៖ ភារ៉ា ដង្កោ
