សារព័ត៌មាន នគរវត្ត តែងតែនាំមុខគេជានិច្ច
ខេត្តកំពត៖ មានរឿងក្នុងសង្គមប្លែកៗ មិនគួរឱ្យកើតមានសោះ ចំពោះករណីខ្លះ ខណ:រឿងរ៉ាវតូចតាច មិនអាចក្លាយទៅរឿងបាត់បង់ជីវិតមនុស្សផុយស្រួលបែបនេះទេ។ ជាក់ស្តែង មានបុរសម្នាក់ឈ្មោះ អៀម ជឿន អាយុ៥៧ ឆ្នាំ មានប្រពន្ធ និងកូនប្រុសស្រីចំនួន៣នាក់ រស់នៅភូមិកោះចំការ ឃុំបឹងសាលាខាងត្បូង ស្រុកកំពង់ត្រាច ត្រូវបានគេប្រទះឃើញសព ក្រោយពេលចេញបាត់ពី ផ្ទះប៉ុន្មានថ្ងៃ ព្រោះតែខឹងប្រពន្ធឈ្មោះ ស៊ាង ច្រប អាយុ៥០ឆ្នាំ ពីដើមហេតុ រឿងយកចំបើងឱ្យគោស៊ីប៉ុណ្ណោះ ។
ករណីខាងលើនេះ ! បើតាមប្រភពពីប្រពន្ធបាននិយាយឱ្យដឹងថា កាលពីព្រឹកថ្ងៃទី២៥ ខែសីហា ឆ្នាំ២០២១ ពេលគាត់ត្រឡប់ មកពីទិញម្ហូបវិញ ឃើញប្ដីដេកនៅលើអង្រឹង ក៏បាន និយាយថា «ឯងម្ដេចមិនទៅយកចំប៉ើងឱ្យគោស៊ី» ស្រាប់តែប្តីក្រោកពីអង្រឹង ហើយតបមកវិញថា «បើឯង ចេះអ៊ីចឹងទៅយកឱ្យស៊ីខ្លួនឯងទៅ» ។ គ្រាន់តែនិយាយប៉ុណ្ណឹងកើតទៅជារឿងមួរម៉ៅ ដើរចេញពីផ្ទះ តែម្តង ។ រហូតដល់បាត់ដំណឹង។
ក្រោយពេលបាត់ខ្លួន អ្នកភូមិបាននាំគ្នាជិះម៉ូតូជួយ ស្វែងរកអស់រយៈពេល៣ថ្ងៃ ប៉ុន្តែនៅតែរកមិនឃើញឡើយ ស្រាប់តែនៅព្រឹកថ្ងៃទី២៩ ខែសីហា ឆ្នាំ ២០២១នេះ អ្នកភូមិកោះចំការម្នាក់ចេញទៅលើកលប ដាក់បង្គា ក្តាម នៅតំបន់អភិរក្សសត្វស្លាបអន្លង់ព្រីង ចម្ងាយពីផ្ទះប្រហែល១គីឡូម៉ែត្រ ក៏ស្រាប់តែប្រទះ ឃើញប្ដីគាត់ស្លាប់នៅគុម្ពចាក ទើបបង្កឱ្យមានការ ភ្ញាក់ផ្អើលដល់គ្រួសារ និងនគរបាលប៉ុស្តិ៍បឹងសាលា ខាងត្បូង និងនគរបាលស្រុកកំពង់ត្រាច ចុះទៅធ្វើការ ពិនិត្យតែម្តង។
អធិការរងនគរបាលស្រុក លោក ឆែម ពិសី បានថ្លែង ថា ករណីអ្នកស្លាប់នៅអន្លង់ព្រីងនោះមិនជាប់ពាក់ព័ន្ធនឹងរឿងឃាតកម្មនោះទេ គឺមកពីជនរងគ្រោះខឹង ប្រពន្ធស្តីបន្ទោសតិចតួចរឿងទៅយកចំបើងឱ្យគោស៊ី ស្រាប់តែដើរបាត់ពីផ្ទះមកដេកស្លាប់នៅតំបន់អភិរក្ស សត្វស្លាបនោះតែម្តង ។បន្ទាប់ពីធ្វើកោសល្យវិច័យរួច សមត្ថកិច្ចក៏បាន អនុញ្ញាតឱ្យក្រុមគ្រួសារដឹកសពតាមទូកមកលំនៅឋានវិញ ដើម្បីរៀបចំធ្វើបុណ្យតាមប្រពៃណី។
ទោះបីជាលោកអធិការនគរបាល ស្រុកកំពង់ត្រាច អះអាងថាករណីនេះ មិនមែនជាអំពើឃាតកម្ម គឺប្ដីខឹងប្រពន្ធរឿងយកចំបើងឲ្យគោស៊ី មកដេករហូតដល់ស្លាប់ ជាករណីមួយអាចនឹងឈានដល់ធ្វើការស៊ើបអង្កេតផងដែរ។
ត្រង់ចំណុចថា , ហេតុអ្វីក៏ជនរងគ្រោះដេករហូតដល់ស្លាប់ ឬមួយគាត់មានសារជាតិអាល់កុលស្រវឹងក្នុងខ្លួន ដើរទៅដេកដល់សន្លប់ រួចក៏បណ្ដាលឲ្យស្លាប់! ៕
ដោយ ៖ សិលា
