សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរសម្នាក់បានបើករថយន្ដព្រូស មួយគ្រឿងគេចពីរថយន្ដស៊េរីទំនើបមួយគ្រឿងទៀតក៏បួងចង្កូតទៅបុករបាំងថ្មពុះចែកទ្រូងផ្លូវបណ្ដាលឲ្យបាក់អស់៣កង់ ចំណែកឯរថយន្ដរងការខូចខាតផ្នែកពីមុខយ៉ាងដំណំ ។
ហេតុការណ៍គ្រោះថ្នាក់ចរាចរណ៍នេះបានកេីតឡេីងកាលពីវេលាម៉ោង១២ និង៤០នាទីរំលងអធ្រាត្រ ឈានចូលថ្ងៃទី៣១ ខែសីហា ឆ្នាំ២០២១ ស្ថិតតាមបណ្ដោយផ្លូវ២៧១ ក្នុងសង្កាត់ទំនប់ទឹក ខណ្ឌបឹងកេងកង រាជធានីភ្នំពេញ។
បេីតាមសម្ដីបុរសម្នាក់ជាតៃកុងរថយន្ដបង្កប្រាប់ឲ្យដឹងថា មុនពេលកើតហេតុរូបគាត់បានបើករថយន្ដម៉ាកព្រូស មួយគ្រឿង ពណ៌ស ពាក់ស្លាកលេខភ្នំពេញ2AG-8316 បានធ្វើដំណើរតាមបណ្ដោយផ្លូវ២៧១ ទិសដៅពីត្បូងមកជេីងក្នុងល្បឿនមធ្យម លុះមកដល់ចំណុចកើតហេតុក៏មានរថយន្ដស៊េរីទំនើបមួយគ្រឿងកំពុងបេីកវ៉ាជែងគ្នា ខណៈនោះគាត់ក៏បានបួងចង្កូតគេចពីរថយន្ដស៊េរីទំនើបនោះ ហេីយក៏ជ្រុលចង្កូតទៅបុករបាំងថ្មពុះចែកទ្រូងផ្លូវបណ្ដាលឲ្យបាក់វៀចអស់ចំនួន៣កង់ ចំណែកឯរថយន្ដបង្កបានរងការខូចខាតផ្នែកខាងមុខយ៉ាងដំណំ តែក្នុងករណីគ្រោះថ្នាក់ចរាចរណ៍ខាងលើនេះគ្មានអ្នករងរបួសនោះទេ។
ក្រោយពេលកើតហេតុ សមត្ថកិច្ចមូលដ្ឋានខណ្ឌបឹងកេងកងបានសហការជាមួយសមត្ថកិច្ចជំនាញចរាចរណ៍ចុះមកធ្វើការវាស់វែងយករថយន្ដបង្កទៅរក្សាទុកនៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញរង់ចាំដោះស្រាយនៅពេលក្រោយ៕
ដោយ ៖ ភារ៉ា ដង្កោ
