សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ ស្រ្តីម្នាក់ជិះម៉ូតូយ៉ាងលឿនទាំងមេឃកំពុងតែភ្លៀង ស្រាប់តែត្រូវជនសង្ស័យជិះម៉ូតូតាមពីក្រោយ រួចក៏ធ្វើសកម្មភាពឆក់កាបូបស្ពាយចំហៀងបានសម្រេច បណ្តាលឲ្យស្ត្រីជាម្ចាស់ម៉ូតូធ្លាក់ពីលើម៉ូតូ បោកក្បាលនឹងថ្នល់ស្លាប់ភ្លាមៗនៅនឹងកន្លែង។
ហេតុការណ៍នេះបង្កឱ្យមានការភ្ញាក់ផ្អើលឡើងកាលពីម៉ោង៨និ៣០នាទីយប់ ថ្ងៃទី៦ ខែកញ្ញា ឆ្នាំ២០២១ នៅតាមបណ្ដោយផ្លូវ១៩៧៨ ទល់មុខផ្ទះលេខ L៨ ស្ថិតក្នុងសង្កាត់ភ្នំពេញថ្មី ខណ្ឌសែនសុខ ។
សពស្ត្រីរងគ្រោះសមត្ថកិច្ចនៅមិនទាន់រកឃើញអត្តសញ្ញាណទេ ហើយក៏មិនទាន់អាចទាក់ទងរកសាច់ញាតិឃើញនៅឡើយដែរ នៅយប់ថ្ងៃកើតហេតុនោះ ចំណែកឯភិនភាគសពស្ត្រីរងគ្រោះ គឺស្លៀកខោអាវឈុតគេង ពណ៌ក្រហម កាឡាការ៉ូលាយលឿង មានអាយុប្រមាណ៣០ឆ្នាំ ជិះម៉ូតូម៉ាក ZoomerX ពណ៌ឈាមជ្រូក ពាក់ស្លាកលេខ ភ្នំពេញ1FH-3509 ។
ប្រភពពីប្រជាពលរដ្ឋនៅកន្លែងកើតហេតុបានឲ្យដឹងថា មុនពេលកើតហេតុ ពួកគាត់បានឃើញស្ត្រីខាងលើជិះម៉ូតូតែម្នាក់ឯង តាមបណ្ដោយផ្លូវលេខ១៩៧៨ ទិសដៅពីលិចទៅកើតក្នុងល្បឿនលឿនគួរសម ស្របពេលមេឃកំពុងតែភ្លៀងផង ខណៈមកដល់ចំណុចកើតហេតុក៏ស្រាប់តែមានជនសង្ស័យ២នាក់បានជិះម៉ូតូប្រដេញតាមជនរងគ្រោះពីក្រោយធ្វើសកម្មភាពឆក់កាបូបស្ពាយចំហៀងពីស្ត្រីរងគ្រោះ បណ្តាលឲ្យស្ត្រីរងគ្រោះធ្លាក់ពីលើម៉ូតូដួលបោកក្បាលទៅនឹងថ្នល់ស្លាប់ភ្លាមៗនៅនឹងកន្លែង បន្ទាប់ពីធ្វើសកម្មភាពឆក់កាបូបបានហើយ ជនសង្ស័យនោះបានបន្ថែមល្បឿន រត់គេចខ្លួនបាត់ស្រមោល ។
បន្ទាប់ពីកើតហេតុ សពស្ត្រីរងគ្រោះ សមត្ថកិច្ចធ្វើតេស្តសំណាកលើសពស្ត្រីរងគ្រោះរួច ចេញលទ្ធផលគឺអវិជ្ជមាន ក្រោយមកសពជនរងគ្រោះត្រូវបានសមត្ថកិច្ចដឹកយកទៅតម្កល់នៅវត្តទឹកថ្លាជាបណ្តោះអាសន្ន ដើម្បីរង់ចាំសាច់ញាតិមកទទួលយកទៅធ្វើបុណ្យនៅពេលក្រោយ ចំណែកម៉ូតូសមត្ថកិច្ចបានយកទៅរក្សាទុកបណ្តោះអាសន្ននៅអធិការដ្ឋានខណ្ឌសែនសុខ៕
ដោយ៖ ជ្រោយពេជ្រ
