សារព័ត៌មាន នគរវត្ត តែងតែនាំមុខគេជានិច្ច
ខេត្តព្រះសីហនុ៖ តបតាមបញ្ជារបស់លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុ នៅព្រឹកថ្ងៃពុធ ៩កើត ខែភទ្របទ ឆ្នាំឆ្លូវ ត្រីស័ក ព.ស. ២៥៦៥ ត្រូវនឹងថ្ងៃទី១៥ ខែកញ្ញា ឆ្នាំ២០២១នេះ បានបញ្ជាឱ្យកម្លាំងនគរបាលប៉ុស្តិ៍ទំនប់រលក សហការជាមួយកម្លាំងគណៈបញ្ជាការឯកភាពស្រុកស្ទឹងហាវ ដឹកនាំដោយលោក ស៊ុន ពិសី អភិបាលរងស្រុកស្ទឹងហាវ និងក្រុមមុជទឹកអង្គភាពកំពង់ផែស្វយ័តក្រុងព្រះសីហនុ ក្រុមការងារក្រុមហ៊ុន ជី.ធី.វី.សុី ស្ពីដប៊ូតកម្ពុជា ( G.T.V.C) ដឹកនាំផ្ទាល់ដោយលោកឧកញ៉ា ទៀ វិចិត្រ កំពុងបន្តរុករកជនរងគ្រោះ មានឈ្មោះ ស៊ន មករា (ហៅឧត្តម) ដែលបានបាត់ខ្លួនដោយសារករណីលិចទូកនេសាទមួយគ្រឿង នៅចំណុចចុងអូរ ចម្ងាយប្រមាណ១០០ម៉ែត្រ ស្ថិតនៅក្រុម១ ភូមិ៤ ឃុំទំនប់រលក ស្រុកស្ទឹងហាវ ខេត្តព្រះសីហនុ កាលពីថ្ងៃទី១៤ ខែកញ្ញាម្សិលមិញនេះ។
សូមជម្រាបថា កាលពីវេលាម៉ោង ២រសៀលថ្ងៃទី១៤ម្សិលមិញនេះ មានទូកនេសាទមួយគ្រឿងបានលិចនៅចំណុចចុងអូរ ចម្ងាយប្រមាណ១០០ម៉ែត្រពីដីគោក បណ្ដាលឱ្យអ្នកនេសាទម្នាក់បាត់ខ្លួន និងម្នាក់ទៀតត្រូវបានរកឃើញភ្លាមៗ ហើយនៅលើទូកនេសាទមានមនុស្សចំនួន២នាក់៖ ទី១-ឈ្មោះ មាឃ សៀក ភេទប្រុស អាយុ៤៧ឆ្នាំ (ឪពុក) មុខរបរនេសាទ និងទី២-ឈ្មោះ ស៊ន មករា (ហៅឧត្តម) ភេទប្រុស អាយុ១៤ឆ្នាំ (បាត់ខ្លួនរកមិនទាន់ឃើញ) ។
គួរបញ្ជាក់ថា ជនរងគ្រោះទាំងពីរជាពលរដ្ឋរស់នៅក្រុម១០ ភូមិ៤ ឃុំទំនប់រលក ស្រុកស្ទឹងហាវ ខេត្តព្រះសីហនុ ។ ក្រោយកើតហេតុ សមត្ថកិច្ចនិងក្រុមសង្គ្រោះរួមនឹងពលរដ្ឋកំពុងស្វែងរកជនរងគ្រោះ៕
ដោយ៖សហការី
