សារព័ត៌មាន នគរវត្ត តែងតែនាំមុខគេជានិច្ច
ខេត្តសៀមរាប៖ បុរសម្នាក់ស្រវឹងស្រាជោកជាំបានយកពូថៅកាប់ប្រពន្ធបណ្តាលស្លាប់ក្រោយពីមានទំនាស់ពាក្យសម្តីគ្នា ហើយបានបន្តទៅកាប់អ្នកជិត ខាង២នាក់ទៀតរងរបួស រួចហើយទើបរត់ទៅចងកសម្លាប់ខ្លួនឯង។ ហេតុការណ៍នេះបានកើតឡើងកាលពីរសៀលថ្ងៃទី១៩ ខែកញ្ញា ឆ្នាំ២០២១ នៅភូមិព្រៃទទឹង ឃុំល្វែងឫស្សី ស្រុកជីក្រែង ខេត្តសៀមរាប ។ ជនបង្កមានឈ្មោះ ឆែម ទក ភេទប្រុស អាយុ៣៤ឆ្នាំ។
តាមរបាយការណ៍របស់សមត្ថកិច្ចបានឱ្យដឹងថា ជនរងគ្រោះឈ្មោះ សាន ចាន់ ជាប្រពន្ធជនបង្កកំពុងនៅផ្ទះ ហើយក៏មានទំនាស់ពាក្យសម្តីជាមួយជនសង្ស័យជាប្តី។ ភ្លាមនោះជនសង្ស័យឈ្មោះ ឆែម ទក ដែលកំពុងស្រវឹងស្រាផងនោះបានស្ទុះទៅយកពូថៅកាប់ទៅលើប្រពន្ធត្រូវក្បាលផ្នែកខាងក្រោយ២ពូថៅបណ្តាលឲ្យស្លាប់ភ្លាមៗ។ បន្ទាប់មកជនសង្ស័យ បានដើរទៅកាប់ជនរងគ្រោះឈ្មោះ ឃាន់ សុខាន់ ភេទស្រី ដែលកំពុងដេកលើអង្រឹងក្រោមផ្ទះគាត់ចម្ងាយពីផ្ទះជនសង្ស័យ ៣០ម៉ែត្រ ត្រូវចំក១ពូថៅបណ្តាលឲ្យរបួស ហើយពេលនោះជនរងគ្រោះម្នាក់ទៀត ឈ្មោះ ឃាន ឆាត ភេទប្រុស ក៏ស្ទុះទៅជួយ ហើយក៏ត្រូវជនសង្ស័យកាប់ត្រូវ ដៃឆ្វេង១ពូថៅ បណ្តាលឲ្យរបួសដែរ។
បន្ទាប់ពីធ្វើសកម្មភាពរួច ជនសង្ស័យបានកាន់ពូថៅរត់ចេញទៅក្រោយផ្ទះគេចខ្លួនបាត់ ។
ក្រោយពេលកើតហេតុ កម្លាំងនគរបាលព្រហ្មទណ្ឌកម្រិតធ្ងន់ និងមានការសម្របសម្រួលពីលោក មាស ច័ន្ទពិសិដ្ឋ ព្រះរាជអាជ្ញាអមសាលាដំបូងខេត្តសៀមរាប ដឹកនាំផ្ទាល់ដោយលោកវរសេនីយ៍ទោ សុខ ម៉េងអ៊ាង នាយការិយាល័យនគរបាលព្រហ្មទណ្ឌកម្រិតធ្ងន់ សហការជាមួយកម្លាំងអធិការដ្ឋាននគរបាលស្រុកជីក្រែង ចុះដល់កន្លែងកើតហេតុស្វែងរកចាប់ខ្លួនជនសង្ស័យ រហូតដល់ម៉ោង១០ថ្ងៃទី២០ ខែកញ្ញានេះ ទើបសមត្ថកិច្ចរកឃើញជនសង្ស័យចងកធ្វើអត្តឃាតនឹងខ្សែនីឡុងនៅលើដើមព្រីងត្រង់ចំណុចព្រៃវាលស្រែនៅខាងលិចផ្ទះជនរងគ្រោះ ប្រហែល៥០០ម៉ែត្រ៕
ដោយ៖ ហេង សូរិយា
