សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ លោកជិន ប៊ុនធឿន នាយកប្រតិបត្តិសាខា នាព្រឹកថ្ងៃចន្ទ ៦រោច ខែភទ្របទ ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃទី២៧ ខែកញ្ញា ឆ្នាំ២០២១នេះ នៅទីស្នាក់ការសាខាកាកបាទក្រហមកម្ពុជារាជធានីភ្នំពេញ បានអញ្ជើញជាអធិបតីក្នុងពិធីបើកវគ្គអប់រំផ្សព្វផ្សាយពីចម្ងាយតាមរយៈការបញ្ជូនរូបភាព និងសំឡេង ( Video Conference ) ស្តីពីសុវត្ថិភាពចរាចរណ៍ ពិការភាព និងជំងឺកូវីដ-១៩ មានរយៈពេល១ព្រឹកជូនដល់ទីប្រឹក្សាយុវជន និងយុវជនកាកបាទក្រហមកម្ពុជា នៅតាមសាលាគោលដៅចំនួន២៧ សរុបចំនួន១៣៥នាក់ ។
មានមតិនាឱកាសបេីកវគ្គនោះ លោកជិន ប៊ុនធឿន បានពាំនាំនូវការផ្តាំផ្ញើសាកសួរសុខទុក្ខ និងសេចក្តីនឹករលឹកពីលោក ឃួង ស្រេង ប្រធានគណៈកម្មាធិការសាខាកាកបាទក្រហមកម្ពុជា រាជធានីភ្នំពេញ ជាពិសេសពីសំណាក់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ជូនដល់អស់លោក លោកស្រីទីប្រឹក្សាយុវជន និងក្មួយៗយុវជនកាកបាទក្រហមទាំងអស់ ព្រមទាំងបានលេីកឡេីងពីគោលបំណងនៃការបេីកវគ្គនេះ គឺដេីម្បីពង្រឹងនូវសមត្ថភាព បង្កេីនចំណេះដឹងបន្ថែមទៀតឲ្យកាន់តែយល់ច្បាស់សម្រាប់ជាមូលដ្ឋានដល់យុវជនកាកបាទក្រហមយេីងទៅលេីការងារសុវត្ថិភាពចរាចរណ៍ ដោយរួមបញ្ចូលពិការភាព ជាពិសេសក្នុងបរិបទជំងឺកូវីដ-១៩ ។
ជាមួយគ្នានេះ លោកនាយកក៏បានចែករំលែកនូវបទពិសោធន៍ និងបានផ្តល់នូវគោលគំនិតសំខាន់ៗមួយចំនួនសម្រាប់ជាទុនដល់យុវជនរបស់យេីងយកទៅអនុវត្តដេីម្បីក្លាយជាយុវជនគំរូឈានមុខ និងជាទំពាំងស្នងឫស្សីរបស់ប្រទេសជាតិយេីងទៅអនាគត ។
ដោយឡែកមុននឹងប្រកាសបេីកវគ្គនេះដែរ លោកនាយកប្រតិបត្តិសាខាសង្ឃឹមយ៉ាងមុតមាំថា៖ ក្មួយៗយុវជនទាំងអស់នឹងខិតខំត្រង់ត្រាប់ស្តាប់គ្រូឧទ្ទេសនាមពន្យល់បង្ហាត់បង្ហាញដោយចិត្តទុកដាក់ ដើម្បីទទួលបានចំណេះដឹងដ៏មានសារៈប្រយោជន៍នេះ ក្នុងការក្លាយខ្លួនជាយុវជនដែលមានសមត្ថភាព និងជាជនបង្គោលសម្រាប់យកទៅអនុវត្ត ក៏ដូចជាផ្សព្វផ្សាយបន្ត នៅក្នុងសាលារៀនរបស់ខ្លួន៕
ដោយ៖សហការី
