សារព័ត៌មាន នគរវត្ត តែងតែនាំមុខគេជានិច្ច
អន្តរជាតិ៖ បើតាមទីភ្នាក់សារព័ត៌មានថៃ Bangkok Post បានដកស្រង់ចេញផ្សាយពីក្រសួងសុខាភិបាលថៃ បានប្រកាសនៅថ្ងៃពុធទី២៩ ខែកញ្ញា ឆ្នាំ២០២១នេះ បន្តរកឃើញករណីឆ្លងជំងឺ COVID-19 ថ្មីៗចំនួន ១០,៤១៤ករណីបន្ថែមទៀត ,ខណៈរកឃើញអ្នកជំងឺចំនួន ១២២នាក់បន្ថែមទៀត ក៏ត្រូវបានរាយការណ៍ថា ស្លាប់ផងដែរ ក្នុងរយៈពេល ២៤ម៉ោងចុងក្រោយដូចគ្នា។បើតាមក្រសួងសុខាភិបាលថៃ បានគូសបញ្ជាក់ថា៖ ក្នុងចំណោមករណីឆ្លងថ្មីៗខាងលើនេះមាន ១០,២៣៦ករណី ត្រូវបានរកឃើញនៅលើប្រជាជនថៃទូទៅ និង ១៧៨ករណីទៀត ត្រូវបានរកឃើញនៅលើអ្នកទោសតាមពន្ធនាគារ។ ក្រៅពីការរកឃើញករណីឆ្លងថ្មីៗខាងលើនេះ ក៏មានអ្នកជំងឺចំនួន ១១,៥៨០នាក់ ក្រោយព្យាបាលជាសះស្បើយ ទើបតែត្រូវបានអនុញ្ញាតឱ្យចាកចេញពីមន្ទីរពេទ្យ។
គួរបញ្ជាក់ថា រហូតមកទល់ពេលនេះ គិតត្រឹមថ្ងៃទី២៨ ខែកញ្ញា ថៃបានចាក់វ៉ាក់សាំងបង្ការ COVID-19 សរុប ៤៩លានដូស ក្នុងនោះប្រជាជនជាង ១៨លាននាក់ (២៦% នៃចំនួនប្រជាជនសរុប) បានទទួលការចាក់គ្រប់ដូស។
បច្ចុប្បន្នប្រទេសថៃ បានកត់ត្រានូវករណីឆ្លងជំងឺ COVID-19 សរុបនៅទូទាំងប្រទេសចំនួន ១,៥៩១,៨២៩ករណី ក្នុងនោះមានអ្នកស្លាប់ ១៦,៦២០នាក់ និងអ្នកជាសះស្បើយឡើងវិញ ១,៤៥៩,៧៨៦នាក់៕
ដោយ៖ស តារា
