សារព័ត៌មាន នគរវត្ត តែងតែនាំមុខគេជានិច្ច
ខេត្តមណ្ឌលគិរី៖ មន្ទីរសាធារណការ និងដឹកជញ្ជូនខេត្តមណ្ឌលគិរី ស្នើរសុំអន្តរាគមន៍ទៅអាជ្ញាធរខេត្តមណ្ឌលគិរី ករណីម្ចាស់រីសត យីហោ « លីលីសាន់រាយស៍រីសត » ទីតាំងនៅតាមផ្លូវជាតិលេខ៧៦ បានចាក់ដីលុបអូរ បាំងមុខទឹក នៅចំណុចស្ពានមួយកន្លែង ស្ថិតនៅភូមិពូលូង សង្កាត់រមនា ក្រុងសែនមនោរម្យ ខេត្តមណ្ឌលគិរី។
មន្ត្រីជំនាញឱ្យដឹងថា មន្ទីរសាធារណការ និងដឹកជញ្ជូនខេត្តមណ្ឌលគិរី បានចុះពិនិត្យឃើញថា ម្ចាស់ទីតាំងដីមួយកន្លែង បានចាក់ដីបាំងមុខទឹកនៅចំណុចស្ពានមួយកន្លែង មានទីតាំងនៅ លីលីសាន់រាយស៍រីសត ស្ថិតលើកំណាត់ផ្លូវជាតិលេខ៧៦ចំណុចគីឡូម៉ែត្រ ១២៩+៦៥៥ ដែលធ្វើឱ្យប្រព័ន្ធបង្ហូរទឹករួមតូច និងខុសទីតាំងមុខទឹក បង្កជាបញ្ហានៅពេលខាងមុខប៉ះពាល់ទៅដល់ក្បាលស្ពាននិងផ្លូវជាតិទៀតផង។
ជុំវិញករណីនេះ នៅថ្ងៃទី០២ខែតុលាឆ្នាំ២០២១ អាជ្ញាធក្រុងសែនមនោរម្យបានដឹកនាំកម្លាំងចម្រុះ ចុះត្រួតពិនិត្យទីតាំងខាងលើ ដោយតម្រូវឱ្យម្ចាស់ទីតាំងដែលបានចាក់ដីលុបអូរ និងចាក់ដីបាំងមុខស្ពាន កាយសម្រួលដីឱ្យទឹកហូរបានលឿនដូចដើមវិញព្រមទាំង កាយដីចេញពីចំណីអូរ ម្ចាស់ទីតាំងដែលលុបចំណីអូរ និងបាំងមុខស្ពាន៕
ដោយ៖ សូរិយា
