សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ នៅថ្ងៃទី១៤ ខែតុលា ឆ្នាំ២០២១ វេលាម៉ោង៩និង៤០នាទីព្រឹក កម្លាំងជំនាញខណ្ឌបានធ្វើការឃាត់ខ្លួនស្រ្តីជនសង្ស័យម្នាក់ជាក់ស្ដែងក្នុងករណីជួញដូរដោយខុសច្បាប់នូវសារធាតុញៀន ត្រង់ចំណុចរបងឃ្លាំងគ្មានលេខ ផ្លូវលេខ ១២៣ សង្កាត់ទួលទំពូង ១ ខណ្ឌចំការមន រាជធានីភ្នំពេញ។
លោកវរសេនីយ៍ទោ ផន អូន អធិការរងទទួលផែនប្រឆាំងគ្រឿងញៀនខណ្ឌចំការមនបានបញ្ជាក់ថា ជាលទ្ធផលកម្លាំងជំនាញខណ្ឌបានធ្វើការឃាត់ខ្លួន ជនសង្ស័យឈ្មោះ សឺង ចិន្តា ភេទស្រី អាយុ៣៥ឆ្នាំ ស្នាក់នៅបន្ទប់ជួលម្តុំលីទ្បា សង្កាត់ផ្សារដើមថ្កូវ ខណ្ឌចំការមន និងដកហូតបានម្សៅក្រាមពណ៌សថ្លាចំនួន១២កញ្ចប់តូចៗ ។
បើតាមលោកវរសេនីយ៍ទោ ផន អូន អធិការរងទទួលផែនប្រឆាំងគ្រឿងញៀនខណ្ឌចំការមនបានប្រាប់ឱ្យដឹងថា ស្រ្តីជាជនសង្ស័យខាងលើបានដើរចុះឡើងនៅតាមផ្លូវ។ដោយមានការសង្ស័យសមត្ថកិច្ចក៏បានធ្វើការត្រួតពិនិត្យហើយបានរកឃើញម្សៅក្រាមពណ៌សចំនួន១២កញ្ចប់តូចៗនៅក្នុងហោប៉ៅខោខាងស្តាំ (សង្ស័យថ្នាំញៀន)។
នៅចំពោះមុខ កម្លាំងជំនាញខណ្ឌកំពុងកសាងសំណុំរឿងបញ្ជូនទៅសាលាដំបូងរាជធានីភ្នំពេញដើម្បីអនុវត្តតាមនីតិវិធី៕
ដោយ៖ ជីណា
