សារព័ត៌មាន នគរវត្ត តែងតែនាំមុខគេជានិច្ច
ខេត្តស្ទឹងត្រែង៖ បន្ទាប់ពីឃាត់ខ្លួនរួចមកសមត្ថកិច្ចនគរបាលខេត្តស្ទឹងត្រែងបានកសាងសំណុំរឿងបញ្ជូនបុរសអ្នកកត់ឆ្នោតវៀតណាមម្នាក់ទៅកាន់តុលាការដើម្បីចាត់ការតាមច្បាប់នៅព្រឹកថ្ងៃទី១៩ ខែតុលា ឆ្នាំ២០២១ ។
សមត្ថកិច្ចបានឱ្យដឹងថា ដោយមានការសម្របសម្រួលពីលោក ជា សុភ័ក្ត្រ ព្រះរាជអាជ្ញារងអមសាលាដំបូងខេត្តស្ទឹងត្រែង កម្លាំងបានចុះបង្ក្រាបទីតាំង លេងល្បែងស៊ីសងដោយខុសច្បាប់ (ឆ្នោតវៀតណាម) ស្ថិតនៅភូមិត្រពាំងព្រីង សង្កាត់ស្ទឹងត្រែង ក្រុងស្ទឹងត្រែង កាលពីថ្ងៃទី១៨ ខែតុលា ឆ្នាំ២០២១។
សូមបញ្ជាក់ថា អ្នកកត់ឆ្នោតវៀតណាម ដែលសមត្ថកិច្ចឃាត់ខ្លួននោះ ឈ្មោះ សៀ ប៊ុនសុង អាយុ២៩ឆ្នាំ មានលំនៅនៅភូមិ-សង្កាត់ខាងលើ ហើយជាមួយគ្នានោះ កម្លាំងជំនាញបានដកហូតយកវត្ថុតាងរួមមាន៖ លុយខ្មែរចំនួន៣.១៤០.០០០ រៀល , ម៉ាស៊ីនគិតលេខចំនួន២គ្រឿង, សៀវភៅកត់ឆ្នោតចំនួន១ក្បាល, ទូរស័ព្ទដៃចំនួន៤គ្រឿង, ម៉ាស៊ីនវេរលុយចំនួន២គ្រឿង, ម៉ាស៊ីនលក់ឆ្នោតចំនួន១គ្រឿង, អត្តសញ្ញាណប័ណ្ណសញ្ជាតិខ្មែរចំនួន២សន្លឹក, កាបូបដាក់លុយពណ៌ខ្មៅចំនួន១ និងសន្លឹកឆ្នោតវៀតណាម១៩សន្លឹក។
ប្រជាពលរដ្ឋបានឱ្យដឹងថា មិនមែនមានតែកន្លែងកត់ឆ្នោតមួយកន្លែងដែលសមត្ថកិច្ចបង្ក្រាបនេះទេគឺនៅមានច្រើនទីតាំងទៀត៕
ដោយ៖ អរុណរះ
