សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ នាព្រឹកថ្ងៃសុក្រ ១រោច ខែអស្សុជ ឆ្នាំឆ្លូវ ត្រីស័ក ព.ស. ២៥៦៥ ត្រូវនឹងថ្ងៃទី២២ ខែតុលា ឆ្នាំ២០២១នេះ នាយឧត្តមសេនីយ៍ គៀត ច័ន្ទថារិទ្ធ អគ្គនាយក នៃអគ្គនាយកដ្ឋានអន្តោប្រវេសន៍ និងជាប្រធានសហព័ន្ធកីឡាវាយកូនឃ្លីលើតុកម្ពុជា បានអញ្ជើញចុះសួរសុខទុក្ខ និងសំណេះសំណាលដល់កីឡាករ កីឡាការិនី និងគ្រូបង្ហាត់កីឡាវាយកូនលើឃ្លីលើតុចំនួន ១៥នាក់ នៅស្តាតមរតកតេជោ ដែលបានត្រូវបានបិតខ្ទុបហ្វឹកហាត់រយ:ពេល ៣ខែ។
ក្នុងការអញ្ជើញចុះសួរសុខទុក្ខ និងសំណេះសំណាលនេះ នាយឧត្តមសេនីយ៍ គៀត ច័ន្ទថារិទ្ធ បានអញ្ជើញនាំយកគ្រឿងឧបភោគ និងភេសជ្ជ:មួយចំនួនដល់ គ្រូបង្ហាត់ ៤នាក់ កីឡាករ ៨នាក់ កីឡាការនី ៣នាក់ និងបានឧបត្ថម្ភបន្ថែម ដោយក្នុងមួយនាក់ទទួលបាន ៦០០,០០០៛ (ហុកសិបម៉ឺនរៀល) ជារៀងរាល់ខែ រយៈពេល ៣ខែ ដើម្បីជាការលើកទឹកចិត្ត ក្នុងពេលកំឡុងការបិទខ្ទុប ការហ្វឹកហាត់ ដោយគិតចាប់ពីថ្ងៃទី១ តុលានេះ។
នាយឧត្តមសេនីយ៍ ប្រធានសហព័ន្ធកីឡាវាយកូនឃ្លីលើតុកម្ពុជា បានបញ្ជាក់បន្ថែមទៀតថា លោកនឹងអញ្ជើញចុះសួរសុខទុក្ខ និងនាំយកគ្រឿងឧបភោគ និងភេសជ្ជ:មួយចំនួន រួមទាំងថវិកាផ្តល់ជួយជារៀងរាល់ខែ ដល់កីឡាករ កីឡាការិនី និងគ្រូបង្ហាត់ ពីលើអ្វីដែលគណៈកម្មាធិការជាតិអូឡាំពិកឧបត្ថម្ភហើយ ដើម្បីផ្តល់ថាមពលបន្ថែមក្នុងការហ្វឹកហាត់។ ហើយសហព័ន្ធកីឡាវាយកូនលើឃ្លីលើតុ មានការរីករាយ និងសប្បាយចិត្ត ចំពោះការយកចិត្តទុកដាក់របស់លោកដល់កីឡាករ កីឡាការិនី និងគ្រូបង្ហាត់។
ចុងបញ្ចប់លោក បានផ្តាំផ្ញេីរឲ្យកីឡាករ កីឡាការិនី ខិតខំហ្វឹកហាត់ គោរពវិន័យឲ្យបានល្អ ហើយអនាគតក្មួយៗជាដំណាងឲ្យមុខមាត់ប្រទេសជាតិ និងកត្តិយសខ្លួនឯងផងដែរ៕
ដោយ៖ សិលា
