សារព័ត៌មាន នគរវត្ត តែងតែនាំមុខគេជានិច្ច
ខេត្តសៀមរាប ៖ មនុស្សម្នាក់ស្លាប់ និង៣នាក់ទៀតរងរបួសធ្ងន់ស្រាល ក្នុងករណីគ្រោះថ្នាក់ចរាចរណ៍ កាលពកាលថ្ងៃទី២២ ខែតុលា ឆ្នាំ២០២១ វេលាម៉ោង ១០និង២៥នាទីព្រឹក លើកំណាត់ផ្លូវជាតិលេខ៦ ត្រង់ចំណុចចន្លោះបង្គោល៣៣៦.៣៣៧ក្នុងភូមិទួលរវៀង ឃុំល្វា ស្រុកពួក ខេត្តសៀមរាប។
លោកវរសេនីយ៍ឯក ទេព ពុំសែន អធិការនៃអធិការដ្ឋាននគរបាលស្រុកពួកបានឲ្យដឹងថា មានករណីគ្រោះថ្នាក់ចរាចរណ៍មួយរវាងរថយន្តម៉ាកហ៊ីយ៉ាន់ដាយ ពណ៌ស្ករ ប្រភេទទេសចរណ៍(២៥កៅអី) ស្លាកលេខ កំពង់ចាម 3B-0422 (អ្នកបើកបរជនមិនស្គាល់អត្តសញ្ញាណ) ធ្វើដំណើរក្នុងទិសដៅពីកើតទៅលិច ។ លុះមកដល់ចំណុចកើតហេតុបានបុកម៉ូតូម៉ាក ហុងដាឌ្រីម ស៊េរីឆ្នាំ២០១៤ ពណ៌ខ្មៅ ស្លាកលេខ 1B.4497 បើកបរដោយឈ្មោះ ព្រឿត ប្រាង ភេទប្រុស អាយុ ៣៥ឆ្នាំ នៅភូមិត្រពាំងត្រុំ ឃុំពពេល ស្រុកសូទ្រនិគម ខេត្តសៀមរាប ដឹកមនុស្សពីរនាក់ ១. ឈ្មោះញឹប សុផល ភេទស្រី អាយុ ៣២ឆ្នាំ ត្រូវជាប្រពន្ធ ២.ឈ្មោះ រើន កញ្ញា អាយុ ០៣ឆ្នាំ ត្រូវជាកូន រស់នៅភូមិឃុំជាមួយគ្នា កំពុងបើកបរក្នុងទិសដៅពីលិចទៅកើត។ ពេលនោះបានជ្រុលទៅបុកម៉ូតូមួយគ្រឿងទៀត ម៉ាកហុងដាឌ្រីម ផលិត ឆ្នាំ២០១៥ ពាក់ស្លាកលេខបន្ទាយមានជ័យ 1M .2465 បើកបរដោយឈ្មោះ រ៉ន ស៊ីវែន ភេទប្រុស អាយុ ៣៥ឆ្នាំ រស់នៅភូមិដំណាក់ខ្ចាស់ ឃុំសំបួរ ស្រុកក្រឡាញ់ ខេត្តសៀមរាប បើកបរទិសដៅពីលិចទៅកើត (បើកខាងមុខ)។
ក្រោយពេលកើតហេតុ អ្នកបើកបររថយន្ត បានបើកចេញពីកន្លែងកើតហេតុទៅដល់ឃុំព្រៃជ្រូក ស្រុកពួក ខេត្តសៀមរាប ទើបទុករថយន្តចោល ហើយអ្នកបើកបរចុះរត់គេចខ្លួនបាត់ ។ ក្នុងហេតុការណ៍គ្រោះថ្នាក់ចរាចរណ៍នេះនេណ្តាលឲ្យស្លាប់មនុស្សចំនួន ០១នាក់ ឈ្មោះ ព្រឿត ប្រាង និងរបួសធ្ងន់ស្រាលចំនួន ០៣នាក់ : ១.ឈ្មោះ ញ៉ិប សុផល រងរបួស (ធ្ងន់) ២.ឈ្មោះ រ៉ន ស៊ីរែន របួស (មធ្យម) ៣.ឈ្មោះ រើន កញ្ញា(ស្រាល) ខូចខាតម៉ូតូចំនួន ០២គ្រឿង ( ស្រាល ០១គ្រឿង និងធ្ងន់ ០១គ្រឿង) និងរថយន្ត ០១គ្រឿង( ស្រាល) ។
លោកវរសេនីយ៍ឯក អធិការស្រុកពួកបានបញ្ជាក់បន្ថែមថា : ករណីគ្រោះថ្នាក់ចរាចរណ៍នេះបង្កឡើងដោយអ្នករថយរថយន្តបើកបរក្នុងល្បឿនលឿន មិនប្រកាន់ស្តាំ ។
ក្រោយកើតហេតុ កម្លាំងការិយាល័យជំនាញសហការជាមួយកម្លាំងប៉ុស្តិ៍នគរបាលរដ្ឋបាលល្វា បានចុះវាស់វែងនិងបញ្ជូនជនរងគ្រោះទៅសង្គ្រោះបន្ទាន់នៅមន្ទីរពេទ្យបង្អែក ហើយធ្វើការប្រគល់សាកសពជូនក្រុមគ្រួសារយកទៅធ្វើបុណ្យតាមប្រពីណី ។ ចំណែកវត្ថុតាងសមត្ថកិច្ចយកមករក្សាទុកនៅអធិការដ្ឋាននគរបាលស្រុកពួក ដើម្បីអនុវត្តតាមនីតិវិធីបន្តទៀត ៕
ដោយ ៖ ប្រាថ្នា
