សារព័ត៌មាន នគរវត្ត តែងតែនាំមុខគេជានិច្ច
ខេត្តបាត់ដំបង៖ មានករណីគ្រោះថ្នាក់ចរាចរណ៍មួយកើតឡើងរវាងរថយន្តនិងម៉ូតូបើកបរច្រាស់គ្នាបណ្តាលឲ្យបុរសម្នាក់បានស្លាប់បាត់បង់ជីវិតយ៉ាងអាណោចអាធ័ម។
ឧបទ្ទវហេតុនេះកើតឡើងនៅថ្ងៃទី២៨ ខែតុលា ឆ្នាំ២០២១ វេលាម៉ោង១៥និង២០នាទី នៅតាមបណ្តោយផ្លូវលេខ១៥៧០ ចន្លោះគីឡូម៉ែត្រលេខ៧-៨ ស្ថិតនៅក្រុមទី១២ ភូមិថ្មី ឃុំតាគ្រាម ស្រុកបាណន់។
លោកវរសេនីយ៍ឯក ប៉ាន់ វ៉ាន់នី អធិការនគរបាលស្រុកបាណន់ បានរារាយការណ៍ឲ្យដឹងថា គ្រោះថ្នាក់នេះបង្កឡើងដោយរថយន្តម៉ាកហ្វុយហ្សូ ចង្កូតស្តាំ ពណ៌ខៀវលាយស ពាក់ស្លាកលេខ BMC-0103 ចង្កូតស្តាំ ប្រភេទបែន ធ្វើដំណើរពីត្បូងទៅជើងបើកបរដោយជនមិនស្គាល់អត្តសញ្ញាណ (រត់គេចខ្លួន) ។លុះមកដល់ផ្លូវកោងត្រង់ចំណុចកើតហេតុខាងលើបានបុកជាមួយម៉ូតូ ១គ្រឿង ម៉ាកPCR (ភីស៊ីអរ) ពណ៌ក្រហម ពាក់ស្លាកលេខ កំពង់ធំ 1J-0178 បើកបរដោយឈ្មោះ ឌិត ម៉ែត ភេទប្រុស អាយុ៥២ឆ្នាំ មានទីលំនៅផ្ទះលេខ៧១ ក្រុមទី៥ ភូមិកំពង់សីមា សង្កាត់វត្តគរ ក្រុងបាត់ដំបង ខណ:កំពុងបើកបរពីជើងទៅត្បូងមានមួកសុវត្ថិភាពបានស្លាប់ភ្លាមៗនៅនឹងកន្លែងកើតហេតុ។
ក្រោយទទួលដំណឹងនេះភ្លាមកម្លាំងជំនាញនគរបាលស្រុកបានធ្វើការត្រួតពិនិត្យនិងវាស់វែង ឃើញថាមូលហេតុនៃគ្រោះថ្នាក់ចរាចរណ៍នេះគឺដោយសារអ្នកបើកបរម៉ូតូបើកបរក្នុងល្បឿនលឿនហើយមកដល់ចំណុចផ្លូវកោងទើបជ្រុលចង្កូតទៅបុករថយន្តពីមុខពេញទំហឹងបណ្តាលឲ្យស្លាប់នៅកន្លែងកើតហេតុ ។
ករណីនេះ សមត្ថកិច្ចបាននាំយកយានយន្តបង្កទាំងពីរគ្រឿងទៅរក្សាទុកនៅអធិការដ្ឋាននគរបាលស្រុក រង់ចាំដំណោះស្រាយតាមនីតិវិធី ។ ចំណែកសាកសពបានប្រគល់ជូនក្រុមគ្រួសារដើម្បីយកទៅធ្វើបុណ្យតាមប្រពៃណី៕
ដោយ ៖ ប្រាថ្នា
