សារព័ត៌មាន នគរវត្ត តែងតែនាំមុខគេជានិច្ច
ខេត្តបន្ទាយមានជ័យ៖ កម្លាំងនគរបាលខេត្តបន្ទាយមានជ័យ នៅថ្ងៃសុក្រទី២៩ ខែតុលា ឆ្នាំ២០២១ បានបញ្ជូនខ្លួនជនសង្ស័យ២នាក់ ដែលជាប់ពាក់ព័ន្ធករណីឆក់កាបូបលុយ ទៅសាលាដំបូងខេត្តបន្ទាយមានជ័យ ដេីម្បីចាត់ការតាមច្បាប់។
បើយោងតាមការបញ្ជាក់ពីលោកវរសេនីយ៍ត្រី នួន នីណារ៉ូ មេបញ្ជាការមូលដ្ឋានកងរាជអាវុធហត្ថក្រុងប៉ោយប៉ែត បានឱ្យដឹងថា ជនសង្ស័យទាំង២នាក់ ទី១/-ឈ្មោះ ភី ប៊ុនតើម ភេទប្រុស អាយុ១៦ឆ្នាំ បច្ចុប្បន្ន រស់នៅភូមិបាលិលេយ្យ២ សង្កាត់ និងក្រុងប៉ោយប៉ែត ខេត្តបន្ទាយមានជ័យ និងទី២/-ឈ្មោះវ៉ុង រ៉ុង ភេទប្រុស អាយុ១៧ឆ្នាំ បច្ចុប្បន្ន រស់នៅភូមិបោះពោធិ៍ ឃុំបោះពោធិ៍ ស្រុកសង្កែ ខេត្តបាត់ដំបង ។
មេបញ្ជាការមូលដ្ឋានកងរាជអាវុធហត្ថក្រុងប៉ោយប៉ែត បានឱ្យដឹងទៀតថា យោងតាមពាក្យបណ្ដឹងរបស់ជនរងគ្រោះ រស់ សិកា ភេទស្រី អាយុ២៣ឆ្នាំ បច្ចុប្បន្ន រស់នៅភូមិក្បាលស្ពាន១ សង្កាត់ និងក្រុងប៉ោយប៉ែត ខេត្តបន្ទាយមានជ័យ ស្ដីពីករណីឆក់កាបូបលុយ កាលពីវេលាម៉ោង១០និង៣០នាទីយប់ថ្ងៃទី២៧ ខែតុលាថ្មីៗនេះ។ ក្រោយពីទទួលបានពាក្យបណ្ដឹងពីជនរងគ្រោះភ្លាម លោកមេបញ្ជាការ បានចាត់តាំងកម្លាំងចុះធ្វើការស្រាវជ្រាវរហូតឈានដល់ការឃាត់ខ្លួនជនសង្ស័យបានចំនួន០២នាក់ ព្រមទាំងដកហូតវត្ថុតាងម៉ូតូដែលជិៈធ្វើសកម្មភាព និងកាបូបលុយដែលពួកគេឆក់ពីជនរងគ្រោះ នៅចំណុចម្ដុំស្រះសួគ៌ជិតវិទ្យាល័យអូជ្រៅ ស្ថិតក្នុងភូមិបាលិលេយ្យ២ សង្កាត់ និងក្រុងប៉ោយប៉ែត ហើយបញ្ជូនមកមូលដ្ឋានកងរាជអាវុធហត្ថក្រុងដើម្បីសួរនាំ ។
បន្ទាប់ពីកម្លាំងជំនាញសាកសួរចម្លើយរួចមកជនសង្ស័យបានឆ្លើយសារភាពថា ពួកគេជិះម៉ូតូ១គ្រឿងមានគ្នា០៣នាក់ ហើយបានធ្វើសកម្មភាពឆក់យកកាបូបលុយពីជនរងគ្រោះខាងលើពិតប្រាកដមែន។ ក្រោយពេលឆក់កាបូបបានពួកគេជិះម៉ូតូគេចខ្លួន ប៉ុន្តែត្រូវបានកម្លាំងអាវុធហត្ថក្រុងស្ទាក់ចាប់បានតែម្ដង ដោយឡែកបក្សពួកគេម្នាក់ទៀតឈ្មោះហ្វី ភេទប្រុស បានរត់គេចខ្លួនបាត់ស្រមោល ។
បច្ចុប្បន្នកម្លាំងជំនាញការិយាល័យព្រហ្មទណ្ឌ នៃកងរាជអាវុធហត្ថខេត្ត នៅថ្ងៃសុក្រទី២៩ ខែតុលា ឆ្នាំ២០២១ បានបញ្ជូនខ្លួនជនសង្ស័យខាងលេីនេះ ទៅតុលាការដេីម្បីចាត់ការតាមច្បាប់៕
ដោយ៖សហការី
