សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ កាលពី៩ ឆ្នាំមុន ថ្ងៃទី២-៣ខែវិច្ឆិកា ឆ្នាំ២០១២ បន្ទាប់ពីមហាសន្និបាតទូទាំងប្រទេស សហភាពសហព័ន្ធយុវជនកម្ពុជា ដែលបានប្រែឈ្មោះជាបន្តបន្ទាប់ពីសមាគមយុវជនសាមគ្គីសង្គ្រោះជាតិកម្ពុជា និងសមាគមយុវជនកម្ពុជា ដែលធ្លាប់ជាផ្នែកមួយនៃរណសិរ្សសាមគ្គីសង្គ្រោះជាតិកម្ពុជា បាន និងកំពុងដើរតួនាទីយ៉ាងសំខាន់ក្នុងនាមជាអ្នកបន្តវេនស្មារតី២ធ្នូ ចូលរួមចំណែកកសាងយុវជនបន្តវេន ដើម្បីធានារក្សាឱ្យបាននូវសមិទ្ធផលទាំងឡាយដែលអតីតយុវជនជំនាន់មុនបានកសាង និងបន្តកសាងនូវសមិទ្ធផលថ្មីៗបន្ថែមទៀតរហូតមកដល់បច្ចុប្បន្ន និងទៅអនាគត។
ជាមួយនឹងការយល់ច្បាស់ពីតួនាទីយ៉ាងសំខាន់របស់យុវជនក្នុងបរិបទសង្គមដែលកំពុងមានការវិវត្តន៍ឥតឈប់ឈរ សហភាពសហព័ន្ធយុវជនកម្ពុជា (ស.ស.យ.ក.) បានសម្រេចលទ្ធផលសម្រាប់សង្គមជាតិគួរជាទីមោទនៈ តាមរយៈការផ្តល់ឱកាសឱ្យយុវជនអាចចូលរួមក្នុងសកម្មភាពសង្គម ផ្តល់ជាវេទិកាដល់យុវជនក្នុងការអភិវឌ្ឍខ្លួន ទាំងចំណេះដឹង និងស្មារតី និងការបង្ហាញផ្លូវសម្រាប់យុវជនអាចក្លាយជាធនធានដ៏សំខាន់សម្រាប់ប្រទេសជាតិនាពេលអនាគត។ លើសពីនេះទៀតសោត ក្នុងដំណាក់ប្រទេសជាតិប្រឈមនឹងវិបត្តិ (បរិបទកូវីដ១៩) ក្រុមគ្រួសារ ស.ស.យ.ក. ទូទាំងប្រទេស បាន និងកំពុងចូលរួមយ៉ាងសកម្មជាមួយរាជរដ្ឋាភិបាលក្នុងយុទ្ធនាការប្រឆាំងជំងឺកូវីដ១៩។
សមាជិក សមាជិកា ស.យ.យ.ក. គ្រប់ៗរូប តែងបានត្រៀមខ្លួនរួចជាស្រេចក្នុងការចូលរួមបម្រើប្រយោជន៍ប្រជាជនគ្រប់កាលៈទេសៈដែលប្រទេសជាតិត្រូវការ៕
ដោយ៖ សហការី
