លួចគាស់ផ្ទះពលរដ្ឋក្នុងបូរីពេជ្រមិនបានសម្រេចត្រូវបានសមត្ថកិច្ចក្របួចជាប់

ខេត្តកណ្ដាល៖ ជនសង្ស័យជាមុខសញ្ញាជាប់ពន្ធនាគារ២នាក់ ធ្វើសកម្មភាពលួចគាស់ផ្ទះពលរដ្ឋមិនបានសម្រេច ត្រូវបានសមត្ថកិច្ចក្របួចជាប់ភា្លមៗ នៅថ្ងៃទី១៣ ខែវិច្ឆិកាឆ្នាំ២០២១ វេលាម៉ោង០៣និង៣០នាទីយប់​ នៅចំណុចផ្ទះល្វែងលេខ៧C បូរីពេជ្រ​ ស្ថិតនៅភូមិព្រែកសំរោង៣ សង្កាត់តាខ្មៅ ក្រុងតាខ្មៅ ខេត្តកណ្ដាល។

    មន្ត្រីនគរបាលក្រុងតាខ្មៅបានឲ្យដឹងថា ជនសង្ស័យ០២នាក់៖ ទី១-ឈ្មោះ ចាន់ សីហា ភេទប្រុស  អាយុ២៣ឆ្នាំ ជនជាតិខ្មែរ មានទីលំនៅភូមិទ្រា សង្កាត់ស្ទឹងមានជ័យ១ ខណ្ឌមានជ័យ រាជធានីភ្នំពេញ  មុខរបរមិនពិតប្រាកដ  (ឃាត់ខ្លួន) និងទី២-ឈ្មោះ ខេង ឃឿន ភេទប្រុស  អាយុ៣៩ឆ្នាំ ជនជាតិខ្មែរ មានទីលំនៅភូមិព្រែកសំរោង សង្កាត់តាខ្មៅ  ក្រុងតាខ្មៅ  ខេត្តកណ្តាល  មុខរបរមិនពិតប្រាកដ  (ឃាត់ខ្លួន)។វត្ថុតាងចាប់យក៖១-ដង្កាប់មួយ(របស់ជនសង្ស័យ),​២-កន្ត្រៃ២ (របស់ជនសង្ស័យ),​៣-ទួណឺវីសមួយ (របស់ជនសង្ស័យ),​៤-ដែកទីប ប្រហោងបួនជ្រុង  មួយកំណាត់ (របស់ជនសង្ស័យ),​៥-កាបូបលុយពណ៌សូកូឡាមួយ និង ឯកសារមួយចំនួន  (របស់ជនសង្ស័យ),​៦-ទូរស័ព្ទម៉ាកខេមហ្វូនមួយ (របស់ជនសង្ស័យ),​៧-កង់មួយគ្រឿង (របស់ជនសង្ស័យ),​៨-ម៉ូតូមួយគ្រឿងម៉ាក suzuki step  ពណ៌ខ្មៅ ស្លាកលេខ បាត់ដំបង ១F ១៨៥៧, ៩-កាំភ្លើងជ័រ ពណ៌ខ្មៅ ចំនួន២ដើម ។

    ប្រភពដដែលបន្តថា កាលពីវេលាកើតហេតុខាងលើ   ជនសង្ស័យទាំង២នាក់ បានជិះកង់ចូលក្នុងបូរីពេជ្រ ដើម្បីរកលួចគាស់ផ្ទះប្រជាពលរដ្ឋ ខណៈមកដល់ផ្ទះល្វែងលេខ៧C ដែលម្ចាស់ផ្ទះបានចាក់សោពីខាងក្រៅទុកចោល រួចជនសង្ស័យបានធ្វើសកម្មភាពយកទួណឺវីស និង ដង្កាប់ ឆ្កឹះនិងគាស់មេសោ  ដើម្បីប៉ុនប៉ងលួចទ្រព្យសម្បត្តិ បណ្តាលឱ្យឮសំឡេង ដល់អ្នកជិតខាងតេប្តឹងសមត្ថកិច្ចប៉ុស្តិ៍តាខ្មៅឱ្យចុះឃាត់ខ្លួន។ 

   ជនសង្ស័យនិងវត្ថុតាង បញ្ជូនមកអធិការដ្ឋាននគរបាលក្រុងតាខ្មៅ ដើម្បីចាត់ការតាមនីតិវិធីតែម្តង។

    បច្ចុប្បន្នជនសង្ស័យទាំង២នាក់ឃាត់ខ្លួនបញ្ជូនមកអធិការដ្ឋាននគរបាលក្រុងតាខ្មៅដើម្បីកសាងសំណុំរឿងចាត់ការតាម​នីតិវិធី៕

ដោយ៖ស្អាង ជ័យ