សារព័ត៌មាន នគរវត្ត តែងតែនាំមុខគេជានិច្ច
ខេត្តបាត់ដំបង៖ មន្រ្តីនគរបាលបានឱ្យដឹងថា ជនសង្ស័យម្នាក់ត្រូវកម្លាំងការិយាល័យព្រហ្មទណ្ឌកម្រិតស្រាលនៃស្នងការដ្ឋានខេត្តរៀបចំសំណុំរឿងបញ្ជូនទៅកាន់តុលាការនៅព្រឹកថ្ងៃទី២២ វិច្ឆិកា ឆ្នាំ២០២១នេះ បន្ទាប់ពីត្រូវឃាត់ខ្លួនក្នុងអំពើចោរកម្ម។
លោកឈឿន គឹមសុង នាយការិយាល័យព្រហ្មទណ្ឌកម្រឹតស្រាលបានឱ្យដឹងថា ជនសង្ស័យដែលបញ្ជូនទៅតុលាការនោះ ឈ្មោះ យន្ត សុភា ភេទប្រុស អាយុ៣៥ឆ្នាំ រស់នៅភូមិវត្តតាមឹម ឃុំអូរដំបង១ ស្រុកសង្កែ។
លោកបានបន្តថា ជននេះត្រូវបានកម្លាំងរបស់លោកឃាត់ខ្លួនបានកាលពីយប់ថ្ងៃទី ២០ វិច្ឆិកា នៅចំណុចភ្លើងស្ដុបផ្សារលើ ស្ថិតក្នុងភូមិកម្មករ សង្កាត់ស្វាយប៉ោ ក្រុងបាត់ដំបង ហើយថែមទាំងដកហូតបានវត្ថុតាងមួយចំនួនត្រឡប់មកវិញផងដែរ។
បើតាមរបាយការណ៍របស់សមត្ថកិច្ចឱ្យដឹងថា ជនសង្ស័យឈ្មោះ យន្ត សុភា បានចូលលួចកាបូបរបស់ម្ចាស់ផ្ទះឈ្មោះ ទូច
វណ្ណារិទ្ធ ភេទប្រុស អាយុ៣៧ឆ្នាំ នៅភូមិវត្តគរ សង្កាត់វត្តគរ ក្រុងបាត់ដំបង កាលពីវេលាម៉ោង៩និង៤០នាទីព្រឹកថ្ងៃទី១៩ ខែវិច្ឆិកា ខណៈដែលជនរងគ្រោះបើកទ្វារផ្ទះចំហហើយរវល់ឡើងទៅលើផ្ទះ។
ប្រភពព័ត៌មានបានឱ្យដឹងទៀតថា ជនសង្ស័យរូបនេះបានជិះកង់កាត់មុខផ្ទះជនរងគ្រោះ ហើយពេលឃើញផ្ទះជនរងគ្រោះបើកទ្វារចំហមិនឃើញមានមនុស្សនៅ ជននេះក៏ទុកកង់ខាងមុខដើរចូលទៅលួចយកកាបូបនៅលើតុក្នុងផ្ទះ រួចរត់គេចខ្លួនបាត់។
រហូតមកដល់យប់ថ្ងៃទី២០ វិច្ឆិកា ទើបកម្លាំងការិយាល័យព្រហ្មទណ្ឌកម្រិតស្រាលតាមឃាត់ខ្លួនបានតែម្ដង។ ជាមួយនឹងការឃាត់ខ្លួននេះ មន្ត្រីជំនាញ ដកហូតបានកាបូប ទូរស័ព្ទ និងឯកសារមួយចំនួនទៀតដែលជារបស់ជនរងគ្រោះមកវិញ។
យោងតាមប្រភពព័ត៌មានបានឱ្យដឹងទៀតថា ជនដៃដល់រូបនេះជាមុខសញ្ញាប្រព្រឹត្តអំពើចោរកម្មយ៉ាងសកម្មនៅក្នុងមូលមូលដ្ឋានហើយក៏ជាអ្នកប្រើប្រាស់ថ្នាំញៀន និងញៀនល្បែងអុីនធើរណេតយ៉ាងងប់ងុលផងដែរ។
ប្រភពបានបញ្ជាក់ថា បន្ទាប់ពីប្រព្រឹត្តអំពើចោរកម្មនៅថ្ងៃចុងក្រោយនេះ គឺសមត្ថកិច្ចបានឃាត់ខ្លួនជននេះ ពេលកំពុងប្រព្រឹត្តល្បែងអុីនធើរណេតនៅក្បែរភ្លើងស្ដុបផ្សារលើ។ លោក ឈឿង គឹមសុង បានបញ្ជាក់ថា ពេលនេះ លោកស្នងការខេត្តបានបញ្ជាឱ្យមន្ត្រីការិយាល័យជំនាញរបស់លោកកសាងសំណុំរឿងបញ្ជូនជនសង្ស័យម្នាក់នេះទៅកាន់តុលាការរួចរាល់ហើយ៕
ដោយ៖ អរុណរះ
