សារព័ត៌មាន នគរវត្ត តែងតែនាំមុខគេជានិច្ច
បច្ចុប្បន្នប្រទេសនៅក្នុងតំបន់អាស៊ាន ក្នុងនោះមានកម្ពុជា ថៃ … ដោយឡែកវៀតណាមវិញមានករណីឆ្លងកូវីដ-១៩កើនឡើងខ្ពស់ដែលមានដល់ទៅជាង១០,២ពាន់នាក់ ក្នុងពេល២៤ម៉ោងនិងស្លាប់ជិត២០០នាក់។ ភាគច្រើនអ្នកឆ្លងនៅក្នុងប្រទេសវៀតណាមគឺមិនទាន់ចាក់វ៉ាក់សាំង។
ពាក់ព័ន្ធនឹងការចាក់វ៉ាក់សាំង វៀតណាមឈរលំដាប់ទីពីរបន្ទាប់ពីប្រទេសឥណ្ឌូនេស៊ី ក្នុងតំបន់អាស៊ានដែលចាក់វ៉ាក់សាំងជូនពលរដ្ឋបានច្រើនបំផុត។ តាមការប្រកាសរបស់ក្រសួងសុខាភិបាលវៀតណាមបានបញ្ជាក់ថា វៀតណាមចាក់វ៉ាក់សាំងបានជាង១០០លានដូសហើយ ដោយក្នុងមួយថ្ងៃៗចាក់ជូនពលរដ្ឋបានដល់ទៅជាង១លានដូស ។
ប៉ុន្តែករណីឆ្លងកូវីដ-១៩ នៅតែកើនឡើងខ្ពស់ដដែល។ តាមការប្រកាសរបស់ក្រសួងសុខាភិបាលវៀតណាមមានករណីឆ្លងថ្មីៗនៃជំងឺកូវីដ-១៩ ចំនួន១០,៣២១ករណីបន្ថែមទៀត ក្នុងរយៈពេល២៤ម៉ោងចុងក្រោយនេះ។ ក្នុងចំណោមករណីឆ្លងថ្មីៗខាងលើមាន២២ករណីជាករណីនាំចូល ក្រៅពីនោះជាករណីឆ្លងក្នុងស្រុកទាំងអស់ ។
ក្នុងរបាយការណ៍ថ្ងៃចន្ទនេះដែរ ក្រសួងសុខាភិបាលវៀតណាម ក៏បានប្រកាសពីករណីអ្នកស្លាប់ថ្មី ដោយសារជំងឺកូវីដ-១៩ ចំនួន១៩០នាក់បន្ថែមទៀតផងដែរ។សរុបមកវិញ គិតត្រឹមយប់ថ្ងៃទី២២ ខែវិច្ឆិកា ឆ្នាំ២០២១នេះវៀតណាមមានករណីឆ្លងកូវីដ-១៩សរុបនៅទូទាំងប្រទេសចំនួន ១,១០៤,៨៣៥នាក់ ក្នុងនោះអ្នកជំងឺជាសះស្បើយចំនួន ៩១០,២៧៦នាក់ ចំណែកអ្នកស្លាប់សរុបចំនួន ២៣,៩៥១នាក់៕ដោយ៖ធីរីណា
រូបថត៖nld.com.vn
