សារព័ត៌មាន នគរវត្ត តែងតែនាំមុខគេជានិច្ច
ខេត្តមណ្ឌលគិរី៖ ប្រជាពលរដ្ឋមានការភ្ញាក់ផ្អើលយ៉ាងខ្លាំងខណៈដែលឃើញមានអគ្គិភ័យមួយបានកើតឡើងនៅក្នុងភូមិរបស់គាត់ ហើយភ្លាមៗនោះពួកគាត់នាំគ្នារត់ទៅជួយ តែពួកគាត់ហួសចិត្តក្រៃពេកពេលទៅដល់កន្លែងកើតហេតុដឹងថាការឆេះនេះគឺមកពីម្ចាស់ផ្ទះដុត។
បេីយោងតាមរបាយការណ៍របស់មន្រ្តីនគរបាលខេត្តមណ្ឌលគិរី បានឱ្យដឹងថានៅព្រឹកថ្ងៃពុធទី២៤ ខែវិច្ឆិកា ឆ្នាំ២០២១ កម្លាំងជំនាញបានចាប់ឃាត់ខ្លួនលោកមេភូមិជេីងខ្លាំងម្នាក់នោះបន្ទាប់ពីផឹកស៊ីស្រវឹងហើយក៏ធ្វើសកម្មភាពដុតបំផ្លាញផ្ទះរបស់ខ្លួនឯងចោល។
សូមបញ្ជាក់ថា ករណីមេភូមិស្រវឹងស្រាដុតផ្ទះខ្លួនឯងខាងលើនេះបានកើតឡើង កាលពីថ្ងៃទី២៣ ខែវិច្ឆិកា ឆ្នាំ២០២១ វេលាម៉ោង១១និង៣០នាទីថ្ងៃត្រង់នៅ ចំណុចភូមិជ្រៃសែន សង្កាត់មនោរម្យ ក្រុងសែនមនោរម្យ ខេត្តមណ្ឌលគិរី។
លោក ឡោ សុខា ស្នងការនគរបាល ខេត្តមណ្ឌលគិរីបានឱ្យដឹងថា ជនបង្កហេតុគឺជាមេភូមិម្នាក់មានឈ្មោះ កេត វុទ្ធី ភេទប្រុស អាយុ៤២ឆ្នាំ ជនជាតិខ្មែរ មុខរបរមេភូមិ ហើយត្រូវចាប់ខ្លួនបន្ទាប់ពីធ្វើសកម្មភាពដុតផ្ទះខ្លួនឯងបណ្តាលឱ្យខូចខាតសម្ភារ រួមមាន៖ ទូដាក់ខោអាវ ចំនួន២ , តុឈើ២, កៅអីតុក្កតាចំនួន៧, គ្រែដេកចំនួន៣ , ម៉ាស៊ីនបោកខោអាវ ចំនួន១គ្រឿង , ទូរទស្សន៍១គ្រឿង , កង្ហារ២គ្រឿង, ខ្សែកមាស១ខ្សែទម្ងន់៦ជី, ម៉ូទ័របូមទឹក២គ្រឿង , ម៉ាស៊ីនកាត់ស្មៅ១ គ្រឿង , ម៉ាស៊ីនត្រង់សឺន័រ១គ្រឿង និង អង្ករចំនួន១បេ។
បច្ចុប្បន្ន ជនបង្កត្រូវបានកម្លាំងសមត្ថកិច្ចចាប់ឃាត់ខ្លួនរក្សាទុកនៅអធិការដ្ឋាននគរបាលក្រុងសែនមនោរម្យ ដើម្បីស៊ើបសួរ និងកសាងសំណ៉ំរឿង បញ្ជូនទៅស្នងការដ្ឋានដើម្បីអនុវត្តតាមនីតិវិធី ។
ប្រជាពលរដ្ឋនាំគ្នាហួសចិត្តហាមាត់និយាយមិនចេញដោយលើកឡើងថាធ្វើដល់មេភូមិមិនគួរគិតខ្លីបែបនេះទាស់តែសោះ៕
ដោយ៖អរុណរះ
