សារព័ត៌មាន នគរវត្ត តែងតែនាំមុខគេជានិច្ច
ក្រុមខ្លាំងមកពីប្រេស៊ីល Palmeiras បានឈ្នះពានរង្វាន់ Copa Libertadores សម្រាប់ឆ្នាំទី២ជាប់ៗគ្នា នៅពេលដែលគ្រាប់បាល់បន្ថែមម៉ោងពីកីឡាករ Deyverson បានផ្តល់ឱ្យពួកគេឈ្នះ ២-១ លើក្រុម Flamengo ដែលមកពីប្រេស៊ីលដូចគ្នាក្នុងការប្រកួតផ្តាច់ព្រ័ត្រកាលពីថ្ងៃសៅរ៍ធ្វើឡើងនៅក្នុងប្រទេសអ៊ុយរ៉ាហ្គាយ។
នេះជាលើកទី៣ហើយដែលក្លិបមានមូលដ្ឋាននៅទីក្រុង Sao Paulo ឈ្នះជើងឯកទ្វីបអាមេរិកខាងត្បូង ស្មើនឹងពានរង្វាន់ Champions League របស់អឺរ៉ុប បន្ទាប់ពីទទួលបានជ័យជម្នះក្នុងឆ្នាំ១៩៩៩ និងឆ្នាំ ២០២០។
គ្រាប់បាល់ទី១របស់ Raphael Veiga បានដាក់ឱ្យ Palmeiras នាំមុខក្រោយរយៈពេល៥នាទី នៅពេលដែលកីឡាកររូបនេះបានស៊ុតបាល់ពីជ្រុងខាងស្តាំ ប៉ុន្តែកីឡាករ Gabriel Barbosa បានតាមស្មើឱ្យក្រុមFlamengo ដោយនៅសល់១៨នាទីទៀតចប់ការប្រកួត។ ទោះបីជាយ៉ាងណាក៏ដោយកីឡាករ Deyverson បានរកគ្រាប់បាល់ក្នុងម៉ោងបន្ថែមដោយស៊ុតផុតដៃអ្នកចាំទី Diego Alves នៅនាទីទី៩៥។
លទ្ធផលនេះគឺជាជ័យជំនះសម្រាប់គ្រូបង្វឹកជនជាតិព័រទុយហ្គាល់លោកAbel Ferreira របស់ក្រុម Palmeiras ដែលបានក្លាយជាជនជាតិអឺរ៉ុបដំបូងគេដែលឈ្នះពាន Libertadores ពីរដង។ ជ័យជម្នះនេះក៏ជាលើកទីមួយដែរ ដែលក្រុមការពារជើងឯក Libertadores ដោយជោគជ័យចាប់តាំងពីក្រុម Boca Juniors ធ្វើបានកាលពីឆ្នាំ២០០១។
ក្រោយចប់ការប្រកួតកីឡាករ Deyverson បាននិយាយថា “មនុស្សគ្រប់គ្នាកំពុងនិយាយថា Palmeiras បានស្លាប់នៅក្នុងការប្រកួតនេះ ប៉ុន្តែយើងជាក្រុមគ្រួសារមួយ។ អ្នកដែលសរសេរយើងចេញមុនការប្រកួត ពួកគេត្រូវគោរពយើងបន្តិចទៀត យើងសមនឹងទទួលបានការអបអរសាទរ”។
ម្ចាស់ជើងឯកពានរង្វាន់ Libertadores ក្នុងឆ្នាំ២០១៩ Flamengo មិនចាញ់ក្នុងការប្រកួតឆ្នាំនេះទេ បន្ទាប់ពីឈ្នះ៩ដង និងស្មើ៣ក្នុងចំណោម១២ប្រកួតរបស់ពួកគេ ប៉ុន្តែពួកគេបានចាញ់ក្រុមPalmeiras ក្នុងការប្រកួតផ្តាច់ព្រ័ត្រឆ្នាំនេះ ៕
ដោយ៖ ភារៈ(រូបភាព ៖ Reuters)
