សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បុរសម្នាក់ ត្រូវក្រុមចោរធ្វើសកម្មភាពវាយប្លន់យកម៉ូតូ និងកាបូបលុយទៅបាត់ដោយសុវត្ថិភាព បណ្ដាលឱ្យរងរបួស បង្កការភ្ញាក់ផ្អើលឡើងកាលពីវេលាម៉ោង០៣ ទៀបភ្លឺថ្ងៃអង្គារ ទី០៧ ខែធ្នូ ឆ្នាំ២០២១នេះ ត្រង់ចំណុចជិតបុរី ប៉េងហួត តាមបណ្តោយផ្លូវ៥៩៨ ក្នុងសង្កាត់ បឹងកក់ទី២ ខណ្ឌទួលគោក រាជធានីភ្នំពេញ ។
បុរសរងគ្រោះមានឈ្មោះ ហោរ ប៉ុនលាភ អាយុ៤៤ឆ្នាំ ជាជាងឡាន នៅផ្លូវជាតិលេខ៣ ទល់មុខនឹងអង្គភាព ង៧០ ស្នាក់នៅកន្លែងធ្វើការមានស្រុកកំណើតនៅស្រុកស្រីសន្ធរ ខេត្តកំពង់ចាម ។
តាមប្រភពព័ត៌មានពីប្រជាពលរដ្ឋដែលរស់នៅក្បែរកន្លែងកើតហេតុ បានឱ្យដឹងថា មុនពេលកើតហេតុ គេឃើញជនរងគ្រោះជិះម៉ូតូមួយគ្រឿងម៉ាក Honda scoppy ពណ៌ស ស៊េរីឆ្នាំ ២០២១ មិនចាំស្លាកលេខ ហើយម៉ូតូនោះ ជាម៉ូតូបង់រំលោះទៀត ជិះតែម្នាក់ឯង តាមបណ្ដោយផ្លូវ៥៩៨ក្នុងទិសដៅ ពីត្បូងទៅជើង លុះមកដល់ ចំណុចកើតហេតុ ក៏លេចមុខជនសង្ស័យ០២នាក់ ជិះម៉ូតូធំមួយគ្រឿង មកអែបជិត ហើយធាក់ជនរងគ្រោះ ដួលខ្ទាតទៅលើចិញ្ចើមផ្លូវ បែកមុខ បែកមាត់សន្លប់ស្ដូកស្ដឹង រួចហើយក្រុមជនសង្ស័យបានលូកយកកាបូបលុយ និងលើក ម៉ូតូជិះត្រឡប់បកក្រោយ ទៅវិញបាត់ស្រមោល បន្សល់នូវ ជនរងគ្រោះបានសន្លប់ស្តូកស្តឹងតែម្នាក់ឯង រយៈពេលប្រហែល០២ម៉ោង ទើបដឹងខ្លួន។
ដោយឡែកបេីតាមការបញ្ជាក់ពីបុរសរងគ្រោះ បានឱ្យដឹងថា រូបគាត់បានចេញពីកន្លែងធ្វើការ នៅមុខ(អង្គភាព ង៧០ ) ទៅផ្ទះបងប្អូន ជួបជុំផឹកស៊ី នៅជិតផ្សារហេងលី ក្រោយពីផឹកស៊ីស្រវឹង ក៏ត្រឡប់ទៅកន្លែងស្នាក់នៅវិញ នៅវេលាម៉ោង ១រំលងអធ្រាត្រឈានចូលថ្ងៃទី៧ ខែធ្នូ ឆ្នាំ២០២១នេះ ស្រាប់តែជិះវង្វេងផ្លូវ ក៏ជួបនឹងជនសង្ស័យចំនួន២នាក់ បានធ្វេីសកម្មភាពត្រួតវាយរូបគាត់រួចប្លន់យកម៉ូតូ និងកាបូបលុយរបស់គាត់ហេីយរត់គេចខ្លួនបាត់តែម្តង។
ក្រោយកើតហេតុ ជនរងគ្រោះ ត្រូវបានសមត្ថកិច្ចប៉ុស្តិ៍នគរបាលរដ្ឋបាលបឹងកក់ទី២ ចុះទៅជួយអន្តរគមន៍នាំយកមកដាក់ពាក្យបណ្ដឹង ដើម្បីកំណត់មុខសញ្ញានិងស្រាវជ្រាវស្វែងរកចាប់ខ្លួនជនសង្ស័យ យកមកផ្តន្ទាទោសទៅតាមច្បាប់ ៕
ដោយ៖ អរុណរះ
