សារព័ត៌មាន នគរវត្ត តែងតែនាំមុខគេជានិច្ច
ការប្រកួត Europa Conference League របស់ក្រុមម្ចាស់ផ្ទះ Tottenham ទល់នឹងក្រុម Rennes នៅរាត្រីថ្ងៃព្រហស្បតិ៍នេះត្រូវបានបិទ បន្ទាប់ពីកីឡាករចំនួន៨នាក់ និងសមាជិក៥នាក់បានធ្វើតេស្តវិជ្ជមានជំងឺCovid-19 នៅក្លិបក្នុងទីក្រុងឡុង។
ការប្រកួតរបស់ពួកគេជាមួយក្រុម Brighton នៅថ្ងៃអាទិត្យក្នុងក្របខ័ណ្ឌPremier League ត្រូវបានគេជឿថាកំពុងស្ថិតក្រោមការត្រួតពិនិត្យផងដែរ។ ក្រុម Spurs បានប្រកាសថា ពួកគេបានបិទមជ្ឈមណ្ឌលហ្វឹកហ្វឺនក្រុមដំបូងកាលពីថ្ងៃពុធ។ក្លិបកំពុងពិភាក្សាបន្តជាមួយ UEFA ហើយនឹងផ្តល់ការលម្អិតបន្ថែមអំពីការប្រកួតនេះក្នុងពេលឆាប់ៗ។
ថ្លែងកាលពីថ្ងៃពុធ អ្នកចាត់ការទូទៅរបស់ Spurs លោក Antonio Conte បាននិយាយថា “ឥឡូវនេះប្រាកដណាស់ យើងមានការភ័យខ្លាចបន្តិច ព្រោះថ្ងៃស្អែកយើងមិនដឹងថាមានអ្វីកើតឡើងនោះទេ។ ជារៀងរាល់ថ្ងៃ យើងមានភាពវិជ្ជមានកាន់តែច្រើន នេះមិនមែនជាស្ថានភាពល្អនោះទេ”។
នៅក្នុងសេចក្តីថ្លែងការណ៍មួយកាលពីយប់ថ្ងៃពុធ ក្លិប Rennes បានរិះគន់ការផ្លាស់ប្តូរនេះដោយនិយាយថា ពួកគេ “រក្សាសិទ្ធិ” ដើម្បីប្តឹងតវ៉ាប្រឆាំងនឹងការសម្រេចចិត្តទៅ UEFA ។
សេចក្តីថ្លែងការណ៍បានបន្ថែមថា “ការខ្វះខាតនៃការលេងដោយយុត្តិធម៌នេះគឺកាន់តែមានភាពស្រឡាំងកាំង ខណៈដែល Tottenham បានបញ្ជាក់តាមអុីមែលថា ការប្រកួតនឹងធ្វើឡើងនៅដើមរសៀល មុនពេលព្រមានក្លិប Rennes ពីចេតនារបស់ពួកគេមិនឱ្យលេងបន្ទាប់ពីចុះចតនៅទីក្រុងឡុង” ។
បន្ទាប់ពីការប្រកួតលីគរបស់ Spurs ទល់នឹង Brighton ពួកគេត្រូវជួប Leicester City នៅថ្ងៃទី១៦ ខែធ្នូ និង Liverpool នៅថ្ងៃទី១៩ ខែធ្នូ មុនពេលការប្រកួត EFL Cup វគ្គ១/៤ ផ្តាច់ព្រ័ត្រជាមួយ West Ham នៅថ្ងៃទី២២ ខែធ្នូ។
កាលពីរដូវកាលមុន ការប្រកួតរបស់ក្រុម Newcastle United ជាមួយ Aston Villa ក្នុងក្របខ័ណ្ឌ Premier League ត្រូវបានពន្យារពេលបន្ទាប់ពី “ការកើនឡើងគួរឱ្យកត់សម្គាល់” នៅក្នុងករណី Covid-19 នៅទីលានហ្វឹកហាត់ Magpies ។ ជាមួយគ្នានេះនៅចុងខែនោះ ការផ្ទុះឡើងនៃមេរោគឆ្លងនៅក្លិប Manchester City បានធ្វើឱ្យការប្រកួត Premier League របស់ពួកគេទល់នឹង Everton ត្រូវបានពន្យារពេល៤ម៉ោងមុនពេលចាប់ផ្តើមការប្រកួត។
ក្លិប Aston Villa ក៏មានការផ្ទុះឡើងនៃជំងឺ Covid-19 នៅក្នុងខែមករាដែលមានន័យថា គ្មានកីឡាករក្រុមដំបូងអាចរកបានសម្រាប់ការបរាជ័យក្នុងជុំទី៣ នៃ FA Cup ដោយក្រុម Liverpool ខណៈដែលការប្រកួត Premier League ជាមួយ Everton និង Tottenham ត្រូវបានកំណត់ពេលឡើងវិញ ៕
ដោយ៖ ភារៈ(រូបភាព ៖ BBC Sport)
