សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បេីយោងតាមប្រភពព័ត៍មានពីស្ថានទូតកម្ពុជាប្រចាំប្រទេសកូរ៉េ តាមរយៈហ្វេសប៊ុកផ្លូវការ នៅវេលាម៉ោង១២ និង៣០នាទីថ្ងៃចន្ទទី២០ ខែធ្នូ ឆ្នាំ២០២១នេះថា៖ នាចុងសប្ដាហ៍នេះ ក្រុមការងារស្ថានទូតដឹកនាំដោយលោកស្រីឯកអគ្គរាជទូត បានអញ្ជើញចុះសាកសួរសុខទុក្ខស្រ្តីខ្មែរ ដែលទើបសម្រាលកូន និងមានជីវភាពខ្វះខាតចំនួន ២គ្រួសារ នៅតំបន់សាសាង ទីក្រុងប៊ូសាន។
ប្រភពដដែលបន្តថា មានកត្តាអាទិភាពបឋមចំនួនពីររបស់លោកស្រីឯកអគ្គរាជទូត និងក្រុមការងារស្ថានទូតកម្ពុជាប្រចាំប្រទេសកូរ៉េ គឺមានដូចខាងក្រោម៖
១- ការដោះស្រាយផលលំបាក បញ្ហាប្រឈម ការផ្ដល់សេវារដ្ឋបាលសាធារណៈឱ្យបានទាន់ពេលវេលាមានប្រសិទ្ធភាព និងការថែទាំសុខភាព របស់បងប្អូនប្រជាជនខ្មែរដែលកំពុងរស់នៅ ធ្វើការ និងសិក្សានៅប្រទេសកូរ៉េ ដើម្បីបងប្អូនមានសេចក្ដីសុខ សុវត្ថិភាព និងមានជីវភាពកាន់តែរីកច្រើន។
២- ជម្រុញកិច្ចការងារការទូតសេដ្ឋកិច្ចរវាងកម្ពុជា-កូរ៉េ ដើម្បីរឹតបណ្ដឹងចំណងមិត្តភាពកាន់តែល្អប្រសើរ ជាពិសេសពង្រីកទំហំពាណិជ្ជកម្ម និងវិនិយោគ រវាងប្រទេសទាំងពីរឱ្យកាន់តែរីកចម្រើនឡើងថែមទៀត។
ជាមួយគ្នានេះ លោកស្រីឯកអគ្គរាជទូត បានអញ្ជើញជួបជាមួយលោកស្រី Cheon Jeon-Hee ប្រធានមជ្ឈមណ្ឌលគាំពារពលករបរទេសទីក្រុងគីមហេ ដើម្បីបន្ដចំណងមិត្តភាព និងស្នើសុំមជ្ឈមណ្ធលបន្ដយកចិត្តទុកដាក់លើការងារដោះស្រាយបញ្ហារបស់ពលករកម្ពុជានៅតំបន់នេះ។
បន្ថែមពីនេះ ក៏បានបន្ដជួបជាមួយថ្នាក់ដឹកនាំ សមាជិក សមាគមខ្មែរទីក្រុងគីមហេ ប្រមាណ ៣០នាក់ដើម្បីសាកសួរសុខទុក្ខ និងពិភាក្សាពីកិច្ចសហការធ្វើសកម្មភាពវប្បធម៌ សង្គម និងជួយដល់បងប្អូនខ្មែរដែលជួបការលំបាកផ្សេងៗ៕
ដោយ៖ស តារា
