សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជា សម្រេចដោះដូរអភិបាលស្រុក៣រូប នៅក្នុងខេត្តកំពង់ឆ្នាំង រួមមាន៖ អភិបាលស្រុកបរិបូណ៌, ស្រុកកំពង់លែង និងស្រុកជលគិរី។ នេះបេីយោងតាមអនុក្រឹត្យរបស់រាជរដ្ឋាភិបាលចុះហត្ថលេខាដោយសម្តេចតេជោ ហ៊ុន សែន នៅថ្ងៃទី២២ ខែធ្នូ ឆ្នាំ២០២១។
ជាក់ស្ដែងយោងតាមអនុក្រឹត្យរបស់រាជរដ្ឋាភិបាលចុះហត្ថលេខាដោយសម្តេចតេជោ ហ៊ុន សែន នាយករដ្ឋមន្ត្រីកម្ពុជា បានសម្រេចបញ្ចប់តំណែងលោក យឹម សារិន ពីអភិបាលស្រុកបរិបូណ៌ ដាក់ជំនួសដោយលោក ចេង ចាន់ដូណា, បញ្ចប់តំណែងលោក ហៃ មនោរម្យ ពីអភិបាលស្រុកជលគិរី ដាក់ជំនួសដោយលោក ដូវ គឹមស៊ីង និងបញ្ចប់តំណែងលោក សំ ចាន់ថន ពីអភិបាលស្រុកកំពង់លែង ដាក់ជំនួសដោយលោក យ៉ែម លក្ខិណា។
ក្នុងអនុក្រឹត្យ បានសម្រេចផ្ទេរភារកិច្ចលោក យឹម សារិន និងលោក ហៃ មនោរម្យ ទៅបម្រើការងារនៅរដ្ឋបាលខេត្តកំពង់ឆ្នាំងជំនួសវិញ។ ដោយឡែកអតីតអភិបាលស្រុកកំពង់លែង លោក សំ ចាន់ថន ដល់អាយុចូលនិវត្តន៍ បច្ចុប្បន្នកំពុងបម្រើការងារជាប្រធានគណៈកម្មការបក្សប្រជាជនកម្ពុជាស្រុកកំពង់លែង។
ដោយឡែកចំពោះការដោះដូរអភិបាលស្រុកទាំង៣រូបខាងលើនេះ គេមិនទាន់ដឹងថាជាពីមូលហេតុអ្វីនោះឡើយ។ តែអ្វីជាការកត់សម្គាល់ការដោះដូរបានធ្វើឡើង បន្ទាប់ពីស្រុកទាំង៣ បានរងការកាប់ទន្ទ្រានកាន់កាប់យកដីព្រៃលិចទឹកបឹងទន្លេសាបជាច្រើនហិកតា។
គួរជម្រាបថា ខេត្តកំពង់ឆ្នាំង មានដីព្រៃលិចទឹកប្រមាណ ២៧,៨៣៨.១៥ហិកតា ត្រូវបានប្រជាពលរដ្ឋប្រគល់ជូនរដ្ឋវិញ ក្រោយពីមានប្រតិបត្តិការក្តៅក្រោមបទបញ្ជាដាច់ណាត់របស់សម្តេចតេជោ ហ៊ុន សែន ឱ្យប្រមូលដីព្រៃលិចទឹកទាំងនោះត្រឡប់មកវិញ៕
ដោយ៖សហការី
