សារព័ត៌មាន នគរវត្ត តែងតែនាំមុខគេជានិច្ច
ក្រុមមេឃខៀវ Manchester City សង្ឃឹមថា នឹងបន្តការឈ្នះពាន Premier League ដែលឈរនៅ៨ប្រកួតនៅពេលដែលម្ចាស់ការពារជើងឯកត្រូវប៉ះ Leicester City នៅកីឡដ្ឋាន Etihad នៅរាត្រីថ្ងៃអាទិត្យនេះ។
ក្រុមម្ចាស់ផ្ទះ Manchester City ឈរលើកំពូលតារាងមាន៤៤ពិន្ទុ នាំមុខក្រុម Liverpool ៣ពិន្ទុឆ្លងកាត់ការប្រកួត១៨លើក។ Manchester City បានឈ្នះការប្រកួត Premier League ចុងក្រោយរបស់ពួកគេក្នុងលទ្ធផល ៤-០ នៅកីឡដ្ឋាន St. James’ Park ទល់នឹងក្រុម Newcastle United ដោយពង្រីកការឈ្នះរបស់ពួកគេដល់ទៅ៨ដង។ ចំណែកការប្រកួត Premier League ចុងក្រោយរបស់ Leicester City បានយកឈ្នះ ៤-០លើក្រុម Newcastle United នៅផ្ទះដោយធ្វើឱ្យពួកគេឈរនៅលេខរៀងទី៩មាន២២ពិន្ទុ។
នៅពេលដែលក្រុមទាំង២ជួបគ្នាចុងក្រោយក្នុងការប្រកួត Premier League ដោយក្រុម Manchester City បានយកឈ្នះ ១-០ នៅកីឡដ្ឋាន King Power ក្នុងខែកញ្ញា ពេលនោះកីឡាករ Bernardo Silva ជាអ្នករកបាន១គ្រាប់ឲ្យ Man City នៅនាទី៦២។
ខ្សែបម្រើឈានមុខ Silva របស់ Manchester City ស៊ុតបញ្ចូលទីបាន៧គ្រាប់ ដែលស្ថិតនៅចំណាត់ថ្នាក់លេខ៥ក្នុងចំណោមកីឡាកររកបានគ្រាប់បាល់ច្រើនជាងគេក្នុងរដូវកាលនេះ។ ចំណែកខ្សែប្រយុទ្ធ Jamie Vardy គឺជាកីឡាករលេចធ្លោរបស់ Leicester ដោយស៊ុតបាន៩គ្រាប់ ហើយកំពុងឈរចំណាត់ថ្នាក់លេខ៣សម្រាប់គ្រាប់បាល់ស៊ុតបញ្ចូលទីច្រើនជាងគេក្នុងលីគនារដូវកាល២០២១-២០២២នេះ។
ក្រុមម្ចាស់ផ្ទះ Manchester City មានភាពស្វិតស្វាញក្នុងការយកឈ្នះលើទឹកដីខ្លួនឯងក្នុងរដូវកាលនេះ ដោយឈ្នះចំនួន៧ដង ស្មើម្តង និងចាញ់តែ១ប៉ុណ្ណោះក្នុងការប្រកួតក្របខ័ណ្ឌ Premier League ចំនួន៩។ Man City មានប្រវត្តិឈ្នះ៤ប្រកួតក្នុងផ្ទះគិតដល់ថ្ងៃទី២១ វិច្ឆិកា ទល់នឹងក្រុមEverton។ ក្នុងការប្រកួតលីគរបស់ពួកគេក្នុងរដូវកាលនេះក្រុម Leicester ឈ្នះ២ ស្មើ៣ និងចាញ់៣ ដែលលើកចុងក្រោយដែលពួកគេទទួលបានជ័យជម្នះនៅក្រៅដីគឺថ្ងៃទី២៤ ខែតុលា ទល់នឹងក្រុម Brentford។ ManCity បានឈ្នះការប្រកួតលីគចំនួន៨ប្រកួតជាប់ៗគ្នាក្នុងរដូវកាលនេះខណៈដែល Leicester ឈ្នះ២ ស្មើ២ និងចាញ់២ ក្នុង៦ប្រកួតចុងក្រោយ។ ក្រុមទាំង២នឹងត្រូវប្រកួតគ្នានៅរាត្រីថ្ងៃអាទិត្យនេះ វេលាម៉ោង១០ម៉ោងនៅកម្ពុជា៕
ដោយ៖ ភារៈ(រូបភាព ៖ soccerway.com)
