សារព័ត៌មាន នគរវត្ត តែងតែនាំមុខគេជានិច្ច
ខេត្តបាត់ដំបង ៖ យោងតាមសេចក្តីរាយការណ៍បានឱ្យដឹងថា គ្រាប់មីន«ស្គរ» ចំនួន០២គ្រាប់បានប៉ើងចេញពីក្នុងដីចម្ការ ខណៈដែលប្រជាពលរដ្ឋកំពុងបើកត្រាក់ទ័រភ្ជួរដី តែសំណាងល្អដែរដែលវាមិនផ្ទុះបណ្តាលឲ្យមានគ្រោះថ្នាក់។
ករណីប្រទះឃើញគ្រាប់យុទ្ធភណ្ឌកប់ក្នុងដីខាងលើនេះ បង្កឱ្យមានការភ្ញាក់ផ្អើលកាលពីវេលាម៉ោង២រសៀលថ្ងៃទី២៩ ខែធ្នូ ឆ្នាំ២០២១ នៅចំណុចអូរដំបង ស្ថិតក្នុងភូមិអូរធំ ឃុំភ្នំព្រឹក ស្រុកភ្នំព្រឹក ដែលធ្វើឱ្យអ្នកបើកត្រាក់ទ័រ និងម្ចាស់ចម្ការភ័យព្រលឹងចុងសក់។
បើតាមសម្តីនាយប៉ុស្ដិ៍នគរបាលឃុំភ្នំព្រឹក លោក អៀប ម៉ៅ បានឱ្យដឹងថា ម្ចាស់ចម្ការខាងលើមានឈ្មោះ សុខ នីន ភេទស្រី អាយុ៤០ឆ្នាំ ជាអ្នកប្រទះឃើញគ្រាប់មីននោះនៅក្នុងដីចម្ការរបស់គាត់ ខណៈដែលគាត់កំពុងឱ្យគេបើកត្រាក់ទ័រភ្ជួរដី។ ភ្លាមៗនោះ គាត់បានរាយការណ៍ទៅលោកមេភូមិ ហើយលោកមេភូមិក៏បានផ្ដល់ព័ត៌មាននេះបន្តមករូបលោក ដើម្បីជួយពិនិត្យ និងមានចំណាត់ការបន្តទៀត។
បើតាមការពិនិត្យជាក់ស្ដែង គ្រាប់នោះវាជាប្រភេទគ្រាប់មីន «ស្គរ» ដែលមានសញ្ញាលេខបូក ហើយនៅមានគុណភាពល្អអាចផ្ទុះបានគ្រប់ពេលវេលាប្រសិនជាយើងប្រហែស។
ម្ចាស់ចម្ការខាងលើក៏បានប្រាប់សមត្ថកិច្ចឱ្យដឹងដែរថា គ្រាប់មីននោះបានផុសឡើងនៅពេលគាត់ឱ្យគេភ្ជួរដោយត្រាក់ទ័រ តែជាដីដែលគាត់បានភ្ជួរដាំដំណាំរាល់ឆ្នាំមកហើយ។
គាត់និយាយថា ជារៀងរាល់ឆ្នាំ គាត់តែងតែប្រើប្រាស់ត្រាក់ទ័រភ្ជួរ តែមិនធ្លាប់ប្រទះឃើញគ្រាប់មីនបែបនេះទេ លុះនៅឆ្នាំនេះស្រាប់តែភ្ជួរចេញគ្រាប់មីនដែលប្រឈមនឹងគ្រោះថ្នាក់បំផុត។
ចំណែកលោក អៀប ម៉ៅ មេប៉ុស្ដិ៍ភ្នំព្រឹក ក៏បានបញ្ជាក់ដែរថា បើតាមប្រវត្តិតំបន់នោះ គឺជាអតីតសមរភូមិសង្គ្រាមដ៏ក្ដៅគគុកកាលពីអំឡុងចន្លោះទសវត្សឆ្នាំ៨០ និង៩០ ដូច្នេះហើយទើបមានគ្រាប់មីននៅសេសសល់ក្នុងដីបែបនេះ។
ប៉ុន្តែទោះបីយ៉ាងណា លោកមេប៉ុស្ដិ៍រូបនេះបានប្រាប់ថា លោកបានរាយការណ៍ជូនទៅអង្គភាពកម្ចាត់មីន ស៊ីម៉ាក់ហើយ។
ពេលនេះមន្ត្រីរបស់លោក និងលោកមេភូមិ បានប្រើខ្សែចងហ៊ុមព័ទ្ធ ដើម្បីរង់ចាំមន្ត្រីស៊ីម៉ាក់ចុះទៅកម្ទេចចោលនៅថ្ងៃទី៣១ ខែខែធ្នូតែម្តង៕
ដោយ៖ អរុណរះ
