សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ មានករណីគ្រោះអគ្គិភ័យមួយបានកេីតឡេីង ដោយសារតែការដុតសំរាមហើយឆ្លងរាលដាលទៅឆាបឆេះទូកុងតឺន័រ មួយទូ នាវេលាម៉ោង១០និង០០នាទីព្រឹក ថ្ងៃទី០៤ ខែមករា ឆ្នាំ២០២២ ស្ថិតនៅចំណុចផ្លូវលេខ២០អា ភូមិក្រាំង សង្កាត់ទៀន ខណ្ឌដង្កោ រាជធានីភ្នំពេញ ព្រមទាំងឆេះបំផ្លាញអស់សម្ភារទាំងស្រុង។
លោកវរសេនីយ៍ឯក ព្រហ្ម យ៉ន នាយការិយាល័យបង្ការពន្លត់អគ្គិភ័យនិងសង្គ្រោះ នៃស្នងការដ្ឋាននគរបាលរាជធានីភ្នំពេញបានប្រាប់ឱ្យដឹងថា ម្ចាស់ទីតាំងមានឈ្មោះ លាង អ័រ ភេទប្រុស អាយុ ២៣ឆ្នាំ មុខរបរអ្នកគ្រប់គ្រង។ ចំពោះមូលហេតុនៃការឆាបឆេះនេះគឺបណ្តាលមកពីការដុតសំរាមបង្កជាអគ្គិភ័យ។
ក្នុងហេតុការណ៍គ្រោះអគ្គិភ័យខាងលេីនេះ បណ្តាលឱ្យឆាបឆេះទូកុងតឺន័រទំហំ (២ម៉ែត្រ x ៦ម៉ែត្រ) ឆេះថ្នាំលាបខ្សែភ្លេីងសាឡុងអស់ទាំងស្រុង តែពុំបណ្តាលឱ្យឆេះរាលដាលដល់ផ្ទះអ្នកក្បែរខាងឡេីយ។
ចំពោះប្រតិបត្តិការសង្គ្រោះវិញ កម្លាំងជំនាញរបស់យេីងបានប្រើប្រាស់រថយន្ដការិយាល័យបង្ការ និងពន្លត់អគ្គិភ័យ ចំនួន១គ្រឿង ប្រើប្រាស់ទឹកអស់១ឡាន ស្មើនឹង៦ម៉ែត្រគូប និងរថយន្តពន្លត់អគ្គិភ័យរបស់ក្រុមហ៊ុនស្រាបៀរកម្ពុជា ចំនួន ១គ្រឿង ប្រេីប្រាស់ទឹកអស់១ឡាន ស្មេីនឹង៦ម៉ែត្រគូប ទើបរលត់ទាំងស្រុង នៅវេលាម៉ោង ១០និង៤០នាទីនាថ្ងៃដដែល៕
ដោយ ៖ ភារ៉ា ដង្កោ
