សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ ស្ត្រី៣នាក់បានរត់ទៅប្តឹងសមត្ថកិច្ចទាំងព្រឹក បន្ទាប់ពីមានជនសង្ស័យធ្វើសកម្មភាពឆក់យកកាបូបលុយរបស់ពួកគាត់ក្នុង៣ករណីផ្សេងគ្នា៖
ករណីទី១ ជនសង្ស័យធ្វើសកម្មភាពឆក់យកកាបូបពីស្ត្រីម្នាក់ពេលដែលគាត់កំពុងជិះម៉ូតូទៅផ្សារ អស់លុយជិត៣០មុឺនរៀលនិងសម្ភារមួយចំនួន កាលពីវេលាម៉ោង៦ព្រឹក ថ្ងៃទី០៨ ខែមករា ឆ្នាំ២០២២ នៅតាមផ្លូវ៣០ម៉ែត្រ ក្បែរផ្សារទួលពង្រ ភូមិទួលពង្រ សង្កាត់ចោមចៅទី១ ខណ្ឌពោធិ៍សែនជ័យ ។
ករណីទី២ ជនសង្ស័យធ្វើសកម្មភាពឆក់យកកាបូបពីស្ត្រី២នាក់ប្តីប្រពន្ធដែលកំពុងជិះម៉ូតូទៅផ្ទះជួល អស់លុយនិងទូរស័ព្ទ៤គ្រឿង គ្រឿងអលង្ការ ទ្រព្យសម្បត្តិសរុបជាង១ពាន់ដុល្លារអាមេរិក កាលពីវេលាម៉ោង៦និង៣០នាទីព្រឹកថ្ងៃទី០៨ ខែមករា ឆ្នាំ២០២២ នៅតាមផ្លូវចោមចៅ មុខបុរីលឹម ឈាងហាក់ ភូមិជ្រៃកោង សង្កាត់ចោមចៅទី២ ខណ្ឌពោធិ៍សែនជ័យ ។
ករណីទី៣ ជនសង្ស័យធ្វើសកម្មភាពឆក់យកកាបូបលុយពីស្ត្រីម្នាក់ដែលកំពុងជិះម៉ូតូឌុបកូនទៅសាលារៀន អស់លុយជាង១លានរៀល ទូរស័ព្ទដៃ១គ្រឿងនិងឯកសារមួយចំនួនទៀត កាលពីវេលាម៉ោង៧ព្រឹកថ្ងៃទី០៨ ខែមករា ឆ្នាំ២០២២ នៅតាមផ្លូវជាតិលេខ៣ ត្រង់ចំណុចភូមិកប់គង សង្កាត់ចោមចៅទី២ ខណ្ឌពោធិ៍សែនជ័យ ។ បើសរុបទាំង៣ករណីគិតជាលុយអស់ច្រើនលានរៀល និងទ្រព្យសម្បត្តិមួយចំនួនទៀត ដោយសុវត្តិភាព គ្មានរំខានដល់សមត្ថកិច្ចឡើយ ។
ជនរងគ្រោះទាំង៣នាក់ ជនរងគ្រោះក្នុងករណីទី១ ឈ្មោះ ហុិន ថារី ភេទស្រី អាយុ៣២ឆ្នាំ មុខរបរកម្មករសំណង់ មានប្តីឈ្មោះ តុំ ឈាន់ អាយុ៣៨ឆ្នាំ មុខរបរ កម្មករសំណង់ ស្នាក់នៅភូមិព្រៃសលិច សង្កាត់ព្រៃស ខណ្ឌដង្កោ មានស្រុកកំណើតនៅភូមិចំណងទៀក ឃុំពាមមន្ទារ ស្រុកកំពង់ត្របែក ខេត្តព្រៃវែង ( អស់លុយជិយ៣០មុឺនរៀល និងសម្ភារៈមួយចំនួន)។ ជនរងគ្រោះក្នុងករណីទី២ ឈ្មោះ គុណ សោភ័ណ្ឌណារី ភេទស្រី អាយុ៣៨ឆ្នាំ មុខរបរមេផ្ទះ មានប្តីឈ្មោះ ញឹក វណ្ណី អាយុ៤៣ឆ្នាំ មុខរបរសន្តិសុខក្រុមហ៊ុនឯកជន ស្នាក់នៅផ្ទះជួល ភូមិព្រែកតាឡុង សង្កាត់ចាក់អង្រែក្រោម ខណ្ឌមានជ័យ មានស្រុកកំណើតនៅឃុំវល្លិ.ស ស្រុកសំរោងទង ខេត្តកំពង់ស្ពឺ ( អស់ទូរស័ព្ទ៤គ្រឿង គ្រឿងអលង្ការ និងសម្ភារមួយចំនួន គិតជាលុយអស់ជាង១ពាន់ដុល្លារ ) ។ ជនរងគ្រោះក្នុងករណីទី៣ ឈ្មោះ ម៉េង ហុងសេង ភេទស្រី អាយុ៤០ឆ្នាំ មុខរបរលក់ដូរ មានទីលំនៅបុរីពិភពថ្មី គម្រោងទី២ ផ្លូវជាតិលេខ៣ ភូមិព្រៃកី(ខ) សង្កាត់ពងទឹក ខណ្ឌដង្កោ ( អស់លុយជាង១លានរៀល ទូរស័ព្ទ១គ្រឿង សម្ភារមួយចំនួន ) ។
តាមសម្តីជនរងគ្រោះទី១បានឱ្យដឹងថា ពេលដែលគាត់ជិះម៉ូតូទៅផ្សារទួលពង្រ ក្នុងគោលបំណងរកទិញម្ហូបមិនទាន់បានទិញផង ត្រូវបានជនសង្ស័យម្នាក់ជិះម៉ូតូពណ៌ស មិនចាំម៉ាក មកឆក់យកកាបូបទៅបាត់ ។
ជនរងគ្រោះទី២ បានឱ្យដឹងថា ពេលដែលគាត់២នាក់ប្រពន្ធវិលមកពីចូលរួមមង្គលការក្មួយឯស្រុក ធ្វើដំណើរទៅផ្ទះជួលវិញ មកដល់ចំណុចផ្លូវចោមចៅ មុខបុរីលឹម ឈាងហាក់ ភូមិជ្រៃកោង ត្រូវបានជនសង្ស័យ៣នាក់ជិះម៉ូតូ២គ្រឿង មកឆក់កាបូបរបស់ប្រពន្ធគាត់ទៅបាត់ ។
ជនរងគ្រោះទី៣ បានឱ្យដឹងថា ពេលដែលឌុបកូន២នាក់ទៅសាលារៀន និងបន្តទៅរកទិញអីវ៉ាន់នៅផ្សារជម្ពូវ័ន ជិះតាមផ្លូវជាតិលេខ៣ ទើបតែមកដល់ចំណុចភូមិកប់គង ត្រូវបានជនសង្ស័យម្នាក់ជិះម៉ូតូមិនចាំម៉ាក ពណ៌សមក ធ្វើសកម្មភាពឆក់យកកាបូបពីចង្កេះទៅបាត់ ។
សម្រាប់ព្រឹកថ្ងៃទី០៨ ខែមករា ឆ្នាំ២០២២នេះ ជនសង្ស័យធ្វើសកម្មភាពឆក់និងលួចហាក់ដូចជាកក្រើកក្នុងខណ្ឌពោធិ៍សែនជ័យ ជនរងគ្រោះបានរត់រកកន្លែងដាក់ពាក្យបណ្តឹងទៅតាមទីកន្លែងកើតហេតុរៀងៗខ្លួន ៕
ដោយ៖សុខាសែនជ័យ
