សារព័ត៌មាន នគរវត្ត តែងតែនាំមុខគេជានិច្ច
ខេត្តបាត់ដំបង ៖ បុរសម្នាក់មិនដឹងថាកើតរោគចិត្ត ឬទោមនស្សរឿងអីនោះទេ បានយកាំបិតអារ.កខ្លួនឯងដាច់បំពង់ខ្យល់ ហើយត្រូវបានអ្នកភូមិរាយការណ៍ប្រាប់សមត្ថកិច្ចមូលដ្ឋាននិងហៅរថយន្តសង្រ្គោះដឹកទៅកាន់មន្ទីរពេទ្យភ្លាមៗ។
ហេតុការណ៍នេះកើតឡើងកាលពីវេលាម៉ោង៩និង៣០នាទីព្រឹកថ្ងៃទី ៨ ខែមករា ឆ្នាំ ២០២២ នៅចំណុចមុខមណ្ឌលចត្តាឡីស័កគីឡូ ៩ ក្នុងភូមិអូរល្វា ឃុំជ្រៃសីមា ស្រុកសំពៅលូន ខេត្តបាត់ដំបង។
មន្ត្រីនគរបាលប៉ុស្តិ៍រដ្ឋបាលជ្រៃសីមាបានឲ្យដឹងថា ជនរងគ្រោះឈ្មោះ ហួន ខាំឈូ ភេទប្រុស អាយុ ៤០ ឆ្នាំ មានទីលំនៅភូមិគោកលុន ឃុំជប់វ៉ារី ស្រុកព្រះនេត្រព្រះ ខេត្តបន្ទាយមានជ័យ មុខរបរកម្មករ។ មុនកើតហេតុជនរងគ្រោះកំពុងសម្រាកព្យាបាលនៅមណ្ឌលចត្តាឡីស័កគីឡូ ៩។
តាមការបំភ្លឺពីសាក្សីឈ្មោះ ឃន សុខុន ភេទប្រុស អាយុ ៣៥ ឆ្នាំ មានទីលំនៅភូមិអូរល្វា ឃុំជ្រៃសីមា បានឲ្យដឹងថា វេលាម៉ោងជាង ៩ ព្រឹក ពេលខ្លួនកំពុងដេកលើអង្រឹងក្នុងរោងចម្ការរបស់ខ្លួនដើម្បីមើលពលករកាប់ដំឡូងឲ្យខ្លួននៅក្នុងដីចម្ការ ភ្លាមនោះ ស្រាប់តែឃើញបុរសម្នាក់ រត់ចេញពីមណ្ឌលចត្តាឡីស័ក ដោយឃើញនៅដៃទាំងសងខាងកាន់កាំបិតហើយបានរត់មកត្រង់ដីចម្ការរបស់ខ្លួន ប្រហែល ២០០ ម៉ែត្រពីមណ្ឌល។
សាក្សីដដែលបន្តថា ពេលនោះ ជនរងគ្រោះ បានយកកាំបិតដែលកាន់ក្នុងដៃ (កាំបិតស) ចាក់ទៅលើពោះ តែមិនមុត ទើបប្រើកាំបិតកញ្ចែត អារ.ក ខ្លួនឯងបណ្ដើរស្រែកបណ្ដើរ។ ដោយឃើញសភាពដូចនេះខ្លួន(សាក្សី) ក៏បានស្រែកហៅពួកប្រុសៗដែលកំពុងកាប់ដំឡូងឲ្យមកជួយឃាត់ តែពេលពួកខ្លួនទៅជិតដល់គ្មាននរណាហ៊ានចូលទៅឃាត់ទេ ទើបធ្វើឲ្យជនរងគ្រោះ អារ.ក ខ្លួនឯង រហូតដាច់បំពង់ខ្យល់ បណ្ដាលឲ្យដេកដួលនៅលើដីចម្ការនោះតែម្ដង។
ក្រោយមកសមត្ថកិច្ច និងគ្រូពេទ្យបានបើករថយន្តមកជួយសង្គ្រោះនិងនាំជនរងគ្រោះទៅកាន់មន្ទីរពេទ្យបង្អែកស្រុកសំពៅលូន តែដោយរបួសធ្ងន់ធ្ងរពេកក្រុមគ្រូពេទ្យបញ្ជូនទៅសង្គ្រោះបន្ទាន់បន្តនៅមន្ទីរពេទ្យបង្អែកខេត្តបាត់ដំបងវិញ។
ចំពោះមូលហេតុដែលធ្វើឲ្យបុរសនេះដាច់ចិត្តធ្វើបែបនេះ គេមិនទាន់ដឹងនៅឡើយទេ ខណ:ប្រជាពលរដ្ឋខ្លះបាននិយាយថា ជនរងគ្រោះជាមនុស្សមិនសូវគ្រប់ទឹក៕
ដោយ ៖ ប្រាថ្នា
