សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ នារីម្នាក់បានបើករថយន្តកាមរីហាយប្រ៊ីដមួយគ្រឿងមិនប្រយ័ត្នជ្រុលទៅបុកខឿនថ្មពុះចែកផ្លូវបណ្ដាលឱ្យរថយន្តបែកម៉ាស៊ីនហូរប្រេងពេញខឿនទៅមុខលែងរួច ។
ហេតុការណ៍គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង១២ និង១០នាទីរំលងអធ្រាត្រឈានចូលថ្ងៃទី១១ ខែមករា ឆ្នាំ២០២២ ត្រង់ចំណុចភ្លើងស្តុបឫស្សីផ្អែម តាមបណ្តោយផ្លូវ៥០ម៉ែត្រ កែងនឹងផ្លូវ៣០ម៉ែត្រ ស្ថិតក្នុងសង្កាត់ព្រៃស ខណ្ឌដង្កោ រាជធានីភ្នំពេញ។
យោងតាមប្រភពព័ត៌មានពីកន្លែងកើតហេតុបានឱ្យដឹងថា មុនពេលកើតហេតុគេឃើញរថយន្តម៉ាកតូយ៉ូតា កាមរីហាយប្រ៊ីដមួយគ្រឿង ពណ៌ស ពាក់ស្លាកលេខភ្នំពេញ2BO-0766ដែលបេីកបរដោយនារីម្នាក់ធ្វើដំណើរតាមបណ្តោយផ្លូវ៥០ម៉ែត្រពីកើតទៅលិចក្នុងល្បឿនលឿន ខណៈមកដល់ចំណុចកើតហេតុខាងលើដោយសារផ្លូវងងឹតផង រីឯខឿនចែកផ្លូវក៏មិនមានស្លាកសញ្ញាបង្ហាញផ្លូវ ព្រមទាំងអ្នកបើកបរមិនប្រយ័ត្នផងនោះក៏ជ្រុលទៅបុកខឿនផ្លូវពេញទំហឹង បណ្ដាលឱ្យរថយន្តឡេីងលេីខឿនផ្លូវនិងបែកម៉ាស៊ីនហូរប្រេងទៅមុខលែងរួច ដោយឡែកខឿនចែកផ្លូវរងការខូចខាតតិចតួច ។
ក្នុងករណីគ្រោះថ្នាក់ចរាចរណ៍នេះមិនបណ្ដាលឱ្យមនុស្សណាម្នាក់រងរបួសនោះទេ រីឯសមត្ថកិច្ចមូលដ្ឋានក្រោយកេីតហេតុភ្លាមៗក៏បានចុះមកពិនិត្យជាក់ស្ដែងនៅកន្លែងកើតហេតុដែរ តែដោយឃើញខឿនផ្លូវមិនមានការខូចខាតធ្ងន់ធ្ងរ ទើបឱ្យម្ចាស់រថយន្តហៅរថយន្តស្ទូចមកស្ទូចយកទៅជួសជុលដោយខ្លួនឯង៕
ដោយ ៖ ភារ៉ា ដង្កោ
