សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បេីយោងតាមប្រភពព័ត៌មានពីអគ្គនាយកដ្ឋានកិច្ចការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ បានឱ្យដឹងថា មន្រ្តីជំនាញ ក.ប.ប. សាខារាជធានីភ្នំពេញ ខេត្តបន្ទាយមានជ័យ ខេត្តស្វាយរៀង ខេត្តកណ្ដាល ខេត្តកំពង់ចាម និងខេត្តព្រៃវែង នាថ្ងៃទី២៦ និង២៧ ខែមករា ឆ្នាំ២០២២ នៅតែបន្តការពារសិទ្ធិដល់អ្នកប្រើប្រាស់ ទប់ស្កាត់អំពើមិនសុចរិតក្នុងធុរកិច្ចប្រេងឥន្ធនៈ និងអំពើមិនស្មោះត្រង់ណាមួយតាមរយៈប្រតិបត្តិការត្រួតពិនិត្យតាមបណ្ដាស្ថានីយ និងដេប៉ូប្រេងឥន្ធនៈស្ថិតក្នុងភូមិសាស្រ្ត នៃខេត្តខាងលើ។
ជាក់ស្ដែងតាមលទ្ធផល នៃការត្រួតពិនិត្យមន្រ្តីជំនាញបានរកឃើញមិនមានអនុលោមភាពចំនួន ៩ទីតាំងក្នុងចំណោម ២៧ទីតាំងដែលបានត្រួតពិនិត្យ និងពិន័យទៅតាមនីតិវិធី។
ជាមួយគ្នានោះ មន្រ្តីជំនាញ ក៏បានរកឃើញដេប៉ូប្រេងឥន្ធនៈ១០បន្ថែមទៀតក្នុងខេត្តស្វាយរៀង ខេត្តរតនគិរី ខេត្តព្រៃវែង ខេត្តកណ្តាល និងខេត្តកំពង់ចាម លក់ប្រេងមិនស្មោះត្រង់ផងដែរ។
ប្រភពដដែលបន្តថា មន្ត្រីស៊ើបអង្កេតនៃសាខា ក.ប.ប. ប្រចាំនៅខេត្តទាំង៥ខាងលើ កាលពីថ្ងៃទី២៦ ខែមករា បានបន្តចុះត្រួតពិនិត្យស្ថានីយ និងដេប៉ូប្រេងឥន្ធនៈ ដើម្បីការពារផលប្រយោជន៍អ្នកប្រើប្រាស់ពីការរកស៊ីកេងប្រវ័ញ្ចរបស់ឈ្មួញទុចរិត នៅក្នុងស្រុកស្វាយទាប ស្រុកបរកែវ ស្រុកកំចាយមារ ស្រុកកណ្តាលស្ទឹង បានសរុបចំនួន ២៣ទីតាំង។
គួរបញ្ជាក់ថា ក្រោយប្រតិបត្តិការរកឃេីញដេប៉ូប្រេងចំនួន ១០ទីតាំង មិនមានអនុលោមភាព និងបានធ្វើការពិន័យអន្តរការណ៍ ទៅតាមនីតិវិធី៕
ដោយ៖សហការី
