សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរសម្នាក់ដែលគេស្គាល់ជាអនាថា ត្រូវបានរថយន្តមិនស្គាល់ម៉ាក បេីកបុកហើយកិនខ្ទេចក្បាលស្លាប់យ៉ាងអាណោចអាធ័មនៅកណ្តាលផ្លូវ កាលពីវេលាម៉ោង៣ និង២០នាទីរំលងអធ្រាត្រ ឈានចូលថ្ងៃទី៣១ ខែមករា ឆ្នាំ២០២២ ទល់មុខច្រកចូលបុរីVIP ផ្លូវ២១៧ ភូមិព្រែកជ្រៃ សង្កាត់ស្ពានថ្ម ខណ្ឌដង្កោ រាជធានីភ្នំពេញ ។
សពជនរងគ្រោះមិនស្គាល់អត្តសញ្ញាណនោះទេ ដោយវ័យប្រហែលជាង៥០ឆ្នាំ ស្លៀកខោខ្លីត្រឹមជង្គង់ អត់មានស្បែកជើង និងអត់ពាក់អាវថែមទៀតផង ។
តាមប្រភពព័ត៌មានពីប្រជាពលរដ្ឋ ដែលធ្វើដំណើរឆ្លងកាត់ និងឃើញហេតុការណ៍ខាងលេី បានឲ្យដឹងថា មុនពេលកេីតហេតុ ពួកគាត់បានជិះម៉ូតូធ្វើដំណើរឆ្លងកាត់ផ្លូវខាងលើ លុះមកដល់ចំណុចកេីតហេតុ ក៏បានប្រទះឃើញ បុរសជនរងគ្រោះ បានដេីរឆ្លងផ្លូវចុះឡើងៗ ហើយមួយសន្ទុះក្រោយមក ពួកគាត់បានជិះម៉ូតូត្រឡប់ក្រោយវិញ ក៏ស្រាប់តែប្រទះឃើញ បុរសខាងលើ បានបែកក្បាលធ្លាយខួរស្លាប់ ដោយសង្ស័យថា បុរសរូបនោះត្រូវរថយន្តមិនស្គាល់ម៉ាក បុកហើយកិនពីលើជនរងគ្រោះបណ្តាលឲ្យស្លាប់យ៉ាងដូច្នេះ ហើយរថយន្តបង្កបានបន្តបេីករត់គេចខ្លួនបាត់តែម្តង ។
បន្តិចក្រោយមក ក៏មានកម្លាំងសមត្ថកិច្ចមូលដ្ឋាន បានចុះទៅកន្លែងកេីតហេតុ និងបានសាកសួរស្វែងរកសាច់ញាតិ តែមិនទាន់ឃើញនៅឡើយទេ ។
បន្ទាប់មកសមត្ថកិច្ចមូលដ្ឋានក៏បានឲ្យរថយន្ដដឹកសពយកទៅតម្កល់ទុកនៅ វត្តឬស្សីសាញ់ ដេីម្បីស្វែងរកសាច់ញាតិមកទទួលនិងចាត់ចែងធ្វេីបុណ្យតាមប្រពៃណី ៕
ដោយ ៖ ភារ៉ា ដង្កោ
