សារព័ត៌មាន នគរវត្ត តែងតែនាំមុខគេជានិច្ច
អតីតកីឡាករវាយតឺន្នីសលេខ១ពិភពលោក Novak Djokovic បានចែកផ្លូវជាមួយគ្រូបង្វឹកលោក Marian Vajda ជាលើកទី២។ កីឡាករ Djokovic សញ្ជាតិស៊ែប៊ីវ័យ៣៤ឆ្នាំ បានបាត់បង់ចំណាត់ថ្នាក់លេខ១ពិភពលោក ដោយចំណាត់ថ្នាក់នេះបានធ្លាក់លើកីឡាកររុស្ស៊ី Daniil Medvedev កាលពីថ្ងៃចន្ទ។
កីឡាករវាយតឺន្នីសសញ្ជាតិស៊ែប៊ីដែលជាម្ចាស់ជ័យលាភី Grand Slam ២០សម័យរូបនេះបានចាប់ផ្តើមធ្វើការជាមួយលោក Slovakian Vajdaកាលពីនៅក្មេងក្នុងឆ្នាំ២០០៦ ហើយអ្នកទាំង២បានបែកគ្នារយៈពេលខ្លីសម្រាប់រយៈពេល១ឆ្នាំក្នុងឆ្នាំ២០១៧។
Djokovic បាននិយាយថា “Marian បាននៅក្បែរខ្ញុំក្នុងអំឡុងពេលដ៏សំខាន់ និងមិនអាចបំភ្លេចបាននៅក្នុងអាជីពរបស់ខ្ញុំ។ យើងរួមគ្នាសម្រេចបាននូវរឿងមិនគួរឱ្យជឿមួយចំនួន ហើយខ្ញុំពិតជាដឹងគុណចំពោះមិត្តភាព និងការលះបង់របស់គាត់ក្នុងរយៈពេល១៥ឆ្នាំចុងក្រោយនេះ”។
Djokovic និងលោក Vajda បានយល់ព្រមចែកផ្លូវគ្នានៅចុងបញ្ចប់នៃរដូវកាលឆ្នាំ២០២១ ដែលកីឡាករសញ្ជាតិស៊ែប៊ីបានឈ្នះពានរង្វាន់ Grand Slam ចំនួន៣។
ដោយត្រូវបាននិរទេសចេញពីប្រទេសអូស្ត្រាលីនៅមុនព្រឹត្តិការណ៍ Australian Open កាលពីខែមុន Djokovic បានត្រឡប់មកលេងនៅទីក្រុងឌូបៃកាលពីសប្តាហ៍មុន ដែលគាត់បានប្រកួតចាញ់កីឡាករ Jiri Vesely ក្នុងវគ្គ 1/4 ផ្តាច់ព្រ័ត្រ។
លោក Vajda បាននិយាយថា គាត់នឹងមើលទៅអតីតកាលរបស់ពួកគេជាមួយគ្នា ជាមួយនឹងមោទនភាពដ៏ធំធេង ហើយលោកកំពុងទន្ទឹងរង់ចាំពីការឆ្ពោះទៅរកការប្រកួតប្រជែងថ្មីៗបន្ថែមទៀតសម្រាប់កីឡាករDjokovic ៕
ដោយ៖ ភារៈ(រូបភាព ៖ BBC Sport)
